જેરુસલેમ/ગાઝા: યુએસની મધ્યસ્થી હેઠળ જાહેર કરાયેલા યુદ્ધવિરામ વચ્ચે પણ ગાઝામાં તણાવ ચરમસીમાએ છે. અમેરિકાએ હમાસ પર ગંભીર આરોપો મૂક્યા બાદ તરત જ ઇઝરાયલ દ્વારા ગાઝા પટ્ટી પર હુમલો કરવામાં આવ્યો હોવાના અહેવાલો છે. જોકે ઇઝરાયેલી સૈન્યએ આ હુમલાની પુષ્ટિ કરી નથી, પરંતુ અપ્રમાણિત અહેવાલો સૂચવે છે કે રફાહ વિસ્તારમાં હવાઈ હુમલા કરવામાં આવ્યા હતા.
ઇઝરાયલની આ કાર્યવાહી યુએસ સ્ટેટ ડિપાર્ટમેન્ટ દ્વારા ગાઝા શાંતિ કરારના તમામ પક્ષોને કરાયેલી ચેતવણી પછી તરત જ કરવામાં આવી છે. યુએસએ "વિશ્વસનીય ગુપ્તચર અહેવાલો" ટાંકીને આરોપ લગાવ્યો હતો કે  હમાસ ગાઝાના વિવાદિત વિસ્તારોમાં નાગરિકો પર "તાત્કાલિક હુમલો" કરવાની યોજના બનાવી રહ્યું છે.  આ કાવતરું યુદ્ધવિરામ કરારનું "ગંભીર ઉલ્લંઘન" ગણાશે અને શાંતિ પ્રક્રિયાને નબળી પાડશે.
હમાસે યુએસના આ દાવાઓને સખત શબ્દોમાં "બનાવટી" ગણાવીને ફગાવી દીધા છે.
યુએસની ચેતવણી પહેલા જ, ઇઝરાયલી વડા પ્રધાન બેન્જામિન નેતન્યાહૂએ શનિવારે કડક વલણ અપનાવતા કહ્યું હતું કે, "જ્યાં સુધી હમાસ સંપૂર્ણપણે નિઃશસ્ત્ર ન થાય અને પેલેસ્ટિનિયન પ્રદેશોનું બિનલશ્કરીકરણ ન થાય ત્યાં સુધી ગાઝામાં યુદ્ધ બંધ નહીં થાય."
નેતન્યાહૂએ એ જ દિવસે જાહેરાત કરી હતી કે ગાઝા અને ઇજિપ્ત વચ્ચેનું રફાહ સરહદ ક્રોસિંગ આગામી સૂચના સુધી બંધ રહેશે. તેમણે સ્પષ્ટ કર્યું હતું કે તેનું ફરીથી ખુલવું હમાસ દ્વારા બાકીના મૃત બંધકોના મૃતદેહ પરત કરવા પર નિર્ભર રહેશે. આ જાહેરાત ઇજિપ્તમાં પેલેસ્ટિનિયન દૂતાવાસે સોમવારે રફાહ ક્રોસિંગ ફરી ખુલવાની આગાહી કરી તેના કલાકો પછી આવી હતી.