નવી દિલ્હી. દિવાળી અને છઠ પૂજાના તહેવારને લઈને દેશભરમાં, ખાસ કરીને દિલ્હી, મુંબઈ અને સુરત જેવા મોટા શહેરોમાંથી પોતાના વતન જઈ રહેલા મુસાફરોની હાલાકી ચરમસીમાએ પહોંચી ગઈ છે. ટિકિટની ભારે અછત અને બસ ભાડામાં પાંચ ગણા વધારા વચ્ચે, લોકો ટ્રેનો પકડવા માટે રેલ્વે સ્ટેશનો પર ૧૨ કલાક સુધી લાંબી કતારોમાં ઊભા રહેવા મજબૂર છે.
 માત્ર શનિવારે જ મુંબઈના છત્રપતિ શિવાજી ટર્મિનસ (CSMT) પર ૧,૭૫,૦૦૦ મુસાફરો પહોંચ્યા, જેમાં ૭૫,૦૦૦ બિન-અનામત મુસાફરો હતા.
મુસાફરોની આ ભીડ અને મુશ્કેલીને ધ્યાનમાં રાખીને, ભારતીય રેલ્વેએ તહેવારોમાં લોકોને રાહત આપવા માટે એક મોટું પગલું ભર્યું છે.
મધ્ય રેલવેના સીપીઆરઓ સ્વપ્નિલ નીલાએ જાહેરાત કરી કે મુસાફરોની સુવિધા માટે ૧,૭૦૨ ખાસ (સ્પેશિયલ) ટ્રેનોની જાહેરાત કરવામાં આવી છે. આ ટ્રેનો છત્રપતિ શિવાજી મહારાજ ટર્મિનસ, લોકમાન્ય તિલક ટર્મિનસ, પુણે, કોલ્હાપુર અને નાગપુર જેવા મુખ્ય સ્ટેશનોથી ઉપડશે.
 હોલ્ડિંગ એરિયા: મુખ્ય સ્ટેશનો પર ૩,૦૦૦ થી વધુ મુસાફરોની ક્ષમતાવાળા હોલ્ડિંગ એરિયા બનાવવામાં આવ્યા છે, જ્યાં ભોજન, પાણી, શૌચાલય અને પંખા જેવી સુવિધાઓ ઉપલબ્ધ છે.
 ટિકિટ: ટિકિટ બુકિંગ સરળ બનાવવા માટે મોબાઇલ યુટીએસ સેવા શરૂ કરાઈ છે અને લાંબી કતારો ટાળવા માટે વધારાના ટિકિટ કાઉન્ટર ખોલવામાં આવ્યા છે.
રેલ્વેએ મુસાફરોને સોશિયલ મીડિયા પર ફરતા ભ્રામક અને જૂના વીડિયોથી સાવધ રહેવા જણાવ્યું છે. રેલ્વે વહીવટીતંત્રે આવા ૨૦ થી વધુ હેન્ડલ્સની ઓળખ કરી છે અને તેમની સામે FIR દાખલ કરવાની પ્રક્રિયા શરૂ કરી છે. મુસાફરોને માત્ર રેલ્વે મંત્રાલયના સત્તાવાર હેન્ડલ (@RailMinIndia) પર જ વિશ્વાસ કરવા વિનંતી કરાઈ છે