બેઇજિંગ. ચીને રવિવારે એક સનસનાટીપૂર્ણ દાવો કરતા યુએસ નેશનલ સિક્યુરિટી એજન્સી (NSA) પર ગંભીર આરોપો લગાવ્યા છે. ચીનના રાજ્ય સુરક્ષા મંત્રાલયે જાહેર કર્યું કે અમેરિકાએ ૨૦૨૨ અને ૨૦૨૪ની વચ્ચે ચીનના નેશનલ ટાઇમ સર્વિસ સેન્ટર પર સાયબર હુમલો કર્યો હતો. ચીને દાવો કર્યો કે આ હુમલાનો ઉદ્દેશ દેશની નાણાકીય વ્યવસ્થા, નેટવર્ક સંચાર અને વીજ પુરવઠાને અસર પહોંચાડવાનો હતો.
ચીનના મંત્રાલયના અહેવાલ મુજબ, યુએસ એજન્સીએ કુલ ૪૨ વિશિષ્ટ સાયબર હથિયારોનો ઉપયોગ કરીને ટાઇમ સર્વિસ સેન્ટરની ઘણી આંતરિક નેટવર્ક સિસ્ટમોને નિશાન બનાવી હતી. એટલું જ નહીં, ૨૦૨૩ અને ૨૦૨૪ દરમિયાન મુખ્ય ટાઇમિંગ સિસ્ટમમાં ઘૂસણખોરી કરવાનો પણ પ્રયાસ કરવામાં આવ્યો હતો.
મંત્રાલયે વધુમાં જણાવ્યું કે યુએસ એજન્સીએ એક વિદેશી મોબાઇલ ફોન બ્રાન્ડની મેસેજિંગ સિસ્ટમમાં રહેલી નબળાઈનો લાભ લઈને ટાઇમ સેન્ટરના કર્મચારીઓના મોબાઇલ ઉપકરણોમાંથી સંવેદનશીલ માહિતી પણ ચોરી કરી હતી. જોકે, ચીને આ મોબાઇલ ફોન બ્રાન્ડનું નામ જાહેર કર્યું નથી.
ટાઇમ સર્વિસ સેન્ટર ચીનનો માનક સમય બનાવે છે અને સંચાર, નાણાં, ઊર્જા અને સંરક્ષણ જેવા ક્ષેત્રોને સમય સેવાઓ પૂરી પાડે છે, તેથી આ હુમલો ખૂબ જ સંવેદનશીલ માનવામાં આવે છે. ચીને અમેરિકા પર સાયબર હુમલા કરીને પછી બીજા પર ખોટો આરોપ લગાવવાનો આરોપ મૂક્યો છે.
નિષ્ણાતો માને છે કે આ તાજેતરનો આરોપ અમેરિકા-ચીન સંબંધોમાં વધુ તણાવ પેદા કરી શકે છે, જે પહેલાથી જ વેપાર અને ટેકનોલોજીના મુદ્દે સંઘર્ષમય છે. યુએસ એમ્બેસી તરફથી હજી સુધી આ આરોપો પર કોઈ સત્તાવાર ટિપ્પણી આવી નથી.