ગાઝા સિટી: ઇઝરાયેલ અને પેલેસ્ટિનિયન જૂથો વચ્ચે થયેલી કેદીઓની અદલાબદલીની સમજૂતીના ભાગરૂપે ઇઝરાયેલ દ્વારા બુધવારે ૫૪ પેલેસ્ટિનિયન નાગરિકોના મૃતદેહો ગાઝાને પરત સોંપવામાં આવ્યા હતા. જોકે, પેલેસ્ટિનિયન તબીબી અધિકારીઓએ ગંભીર આક્ષેપો કરતાં જણાવ્યું છે કે આ મૃતદેહો પરથી ક્રૂર ત્રાસ, દુરુપયોગ અને તાત્કાલિક ગોળી મારી હત્યા કરવાના સ્પષ્ટ પુરાવા મળ્યા છે.

આ અહેવાલોએ આંતરરાષ્ટ્રીય સ્તરે ખળભળાટ મચાવી દીધો છે. દક્ષિણ ગાઝાના ખાન યુનિસ શહેરમાં આ તમામ ૫૪ અજાણ્યા મૃતદેહોની સામૂહિક દફનવિધિ કરવામાં આવી હતી.

તદેહો ઓળખી શકાય તેમ ન હતા: પ્રાપ્ત વિગતો અનુસાર, દક્ષિણ ગાઝાના ખાન યુનિસમાં આવેલી નાસેર હોસ્પિટલ ખાતે જ્યારે આ મૃતદેહો લાવવામાં આવ્યા, ત્યારે ત્યાં હૃદયદ્રાવક દ્રશ્યો સર્જાયા હતા. મૃતદેહો એટલી હદે વિકૃત અને ક્ષતવિક્ષત હાલતમાં હતા કે તેમના પરિવારોના સભ્યો પણ તેમને ઓળખી શક્યા ન હતા. ભારે હૈયે, આ તમામ અજાણ્યા મૃતદેહોને એક સામૂહિક કબરમાં દફનાવવાની ફરજ પડી હતી.

કવ્સ ન્યૂઝ નેટવર્ક દ્વારા પ્રસારિત તસવીરો અને વીડિયોમાં, સફેદ કફનમાં લપેટાયેલા મૃતદેહોને એક લાંબી હરોળમાં દફનાવતા જોઈ શકાય છે.

તબીબી અધિકારીઓના ચોંકાવનારા દાવા: ગાઝાના સરકારી મીડિયા કાર્યાલયના ડાયરેક્ટર ઇસ્માઇલ અલ-થાવાબ્તાએ એક પ્રેસ કોન્ફરન્સમાં જણાવ્યું હતું કે, તબીબી તપાસ ટીમોને મૃતદેહો પરથી અત્યંત ભયાનક પુરાવા મળ્યા છે.

તેમણે દાવો કર્યો કે:

 * ઘણા મૃતદેહોના ગળા પર ફાંસીના અથવા દોરડા વડે ગળું દબાવવાના સ્પષ્ટ નિશાન હતા.

 * શરીરના જુદા જુદા ભાગો પર દાઝી ગયેલાના નિશાન અને હાડકાં તૂટેલી હાલતમાં મળી આવ્યા હતા.

 * કેટલાક મૃતદેહોને ખૂબ જ નજીકથી માથામાં ગોળી મારવામાં આવી હોવાના પુરાવા છે.

 * કેટલાક મૃતદેહો પરથી લશ્કરી વાહનો ફેરવી દેવામાં આવ્યા હોય તેવા સંકેતો પણ મળ્યા છે.

પેલેસ્ટિનિયન આરોગ્ય મંત્રાલયના સૂત્રોએ એવો પણ ગંભીર આરોપ મૂક્યો છે કે મૃતદેહોમાંથી આંખો, કોર્નિયા અને અન્ય મહત્વપૂર્ણ આંતરિક અંગો ગાયબ હતા, જે 'ઓર્ગન થેફ્ટ' (અંગોની ચોરી) તરફ ઇશારો કરે છે.

અધિકારીઓએ જણાવ્યું હતું કે, "આ તમામ પુરાવા સ્પષ્ટપણે દર્શાવે છે કે ઇઝરાયેલી કસ્ટડીમાં આ લોકોની 'ફિલ્ડ એક્ઝેક્યુશન' (એટલે કે સ્થળ પર જ હત્યા) કરવામાં આવી હતી." પેલેસ્ટિનિયન સત્તાવાળાઓએ આ સમગ્ર મામલે તાત્કાલિક આંતરરાષ્ટ્રીય અને નિષ્પક્ષ તપાસની માંગ કરી છે.