કર્ણાટકના મુખ્યમંત્રી સિદ્ધારમૈયાના પુત્ર યતીન્દ્રના એક નિવેદનથી રાજ્યના રાજકારણમાં ગરમાવો આવ્યો છે. તેમણે પોતાના પિતાની રાજકીય કારકિર્દીને અંતિમ તબક્કામાં ગણાવી અને મંત્રી સતીશ જારકીહોલીને પ્રગતિશીલ વિચારધારાના નેતા તરીકે પ્રોજેક્ટ કરતા નેતૃત્વ પરિવર્તનની ચર્ચાઓ શરૂ થઈ છે. જોકે, વિવાદ વકરતા યતીન્દ્રએ સ્પષ્ટતા પણ કરવી પડી હતી.

વિગતવાર જોઈએ તો બેલગાવી: કર્ણાટકમાં કોંગ્રેસ સરકાર તેના પાંચ વર્ષના કાર્યકાળનો અડધો તબક્કો પૂર્ણ કરવા જઈ રહી છે, ત્યારે જ મુખ્યમંત્રી સિદ્ધારમૈયાના પુત્ર અને વિધાન પરિષદના સભ્ય (એમએલસી) યતીન્દ્ર સિદ્ધારમૈયાના એક નિવેદને રાજકીય ગરમાવો લાવી દીધો છે.

૨૨ ઓક્ટોબરના રોજ બેલગાવી જિલ્લાના એક જાહેર કાર્યક્રમમાં બોલતા યતીન્દ્રએ કહ્યું કે, "મારા પિતાજી (સિદ્ધારમૈયા) હવે તેમના રાજકીય જીવનના અંતિમ તબક્કામાં છે." આટલેથી ન અટકતા, તેમણે મંચ પર હાજર રાજ્યના મંત્રી સતીશ જારકીહોલીના ભરપૂર વખાણ કર્યા હતા. યતીન્દ્રએ કહ્યું કે, "સતીશ જારકીહોલી એક પ્રગતિશીલ અને વૈચારિક રીતે પ્રતિબદ્ધ નેતા છે. પક્ષની વિચારધારાને આગળ વધારવા માટે તેમના જેવા નેતાઓની જરૂર છે અને તેમણે આ જવાબદારી ઉઠાવવી જોઈએ."

યતીન્દ્રના આ નિવેદનથી કર્ણાટકના રાજકીય વર્તુળોમાં નેતૃત્વ પરિવર્તનની અટકળોએ જોર પકડ્યું છે. ઉલ્લેખનીય છે કે, મુખ્યમંત્રી પદ માટે નાયબ મુખ્યમંત્રી ડી.કે. શિવકુમાર પણ પ્રબળ દાવેદાર મનાય છે. આવા સમયે યતીન્દ્ર દ્વારા સતીશ જારકીહોલીને (જેઓ એક પ્રભાવશાળી એસટી નેતા છે) આગળ ધરવામાં આવતા આને સિદ્ધારમૈયા જૂથ દ્વારા શિવકુમારના વિકલ્પ તરીકે જારકીહોલીને રજૂ કરવાના પ્રયાસ તરીકે જોવામાં આવી રહ્યું છે.

જોકે, પોતાના નિવેદનથી વિવાદ સર્જાતા યતીન્દ્રએ બાદમાં પત્રકારો સાથેની વાતચીતમાં સ્પષ્ટતા કરી હતી. તેમણે કહ્યું કે, "મારા કહેવાનો અર્થ એવો નહોતો કે મારા પિતા આવતીકાલે જ રાજકારણમાંથી નિવૃત્ત થઈ રહ્યા છે. મારો સંદર્ભ વર્ષ ૨૦૨૮ની  આગામી વિધાનસભા ચૂંટણીઓનો હતો, જેમાં તેઓ કદાચ ઉમેદવારી નહીં કરે." તેમણે ભારપૂર્વક કહ્યું કે તેમણે રાજકીય વારસદારની નહીં, પરંતુ પક્ષના વૈચારિક નેતૃત્વની વાત કરી હતી.