નવી દિલ્હી, તા. ૨૩ ઓક્ટોબર: દિલ્હીના રોહિણી વિસ્તારમાં ગઈ કાલે રાત્રે એક હાઇ-વોલ્ટેજ સંયુક્ત એન્કાઉન્ટરમાં બિહારના ચાર મોસ્ટ વોન્ટેડ ગેંગસ્ટરોને ઠાર કરવામાં આવ્યા છે. દિલ્હી પોલીસની ક્રાઈમ બ્રાન્ચ અને બિહાર પોલીસની સંયુક્ત ટીમે બહાદુર શાહ માર્ગ પર આ ઓપરેશન પાર પાડ્યું હતું.
વહેલી સવારે ૨:૨૦ વાગ્યે શરૂ થયેલા આ એન્કાઉન્ટર દરમિયાન, ચારેય આરોપીઓએ પોલીસ પર ફાયરિંગ શરૂ કરી દીધું હતું. જવાબી કાર્યવાહીમાં પોલીસે ચારેય બદમાશોને ઠાર માર્યા હતા. મૃતદેહોને તાત્કાલિક રોહિણીની ડૉ. બીએસએ હોસ્પિટલમાં લઈ જવામાં આવ્યા હતા, જ્યાં તેમના મૃત્યુની પુષ્ટિ કરવામાં આવી હતી.
કોણ હતા આ ગેંગસ્ટરો?
ઠાર કરાયેલા ચારેય બદમાશો બિહારની કુખ્યાત 'સિગ્મા એન્ડ કંપની' ગેંગના સભ્યો હતા. તેમની ઓળખ રંજન પાઠક (ઉં.વ. ૨૫), બિમલેશ મહતો (ઉં.વ. ૨૫), મનીષ પાઠક (ઉં.વ. ૩૩) અને અમન ઠાકુર (ઉં.વ. ૨૧) તરીકે થઈ છે. રંજન, બિમલેશ અને મનીષ બિહારના સીતામઢી જિલ્લાના રહેવાસી હતા, જ્યારે અમન ઠાકુર દિલ્હીના કરવાલ નગરનો રહેવાસી હતો. પોલીસના જણાવ્યા અનુસાર, આ ગેંગ બિહાર અને નેપાળમાં અનેક ગંભીર ગુનાહિત પ્રવૃત્તિઓમાં સામેલ હતી.
રંજન પાઠકની ક્રૂરતા
ગેંગનો સરગના રંજન પાઠક હતો, જે તેની ક્રૂરતા અને બેખૌફ સ્વભાવ માટે કુખ્યાત હતો. રંજન પાઠક એ જ શાતિર ગુનેગાર હતો, જેણે સીતામઢીમાં એક સનસનીખેજ હત્યા બાદ મીડિયાકર્મીઓને પોતાનો 'બાયોડેટા' મોકલીને ખબર ફેલાવી હતી.
ચૂંટણી પહેલા આતંક ફેલાવવાનું ષડયંત્ર નિષ્ફળ
પોલીસના જણાવ્યા અનુસાર, તેમને તાજેતરમાં એક ઓડિયો કૉલ મળ્યો હતો, જેમાં આ ગેંગ બિહાર વિધાનસભા ચૂંટણી પહેલા દહેશત ફેલાવવાનું ષડયંત્ર રચી રહી હોવાનો ખુલાસો થયો હતો. આ ગેંગ માત્ર બિહારમાં જ નહીં, પરંતુ નેપાળ સુધી પણ પોતાના ગુનાઓનું નેટવર્ક ફેલાવી રહી હતી.
દિલ્હી અને બિહાર પોલીસની લાંબી શોધખોળ બાદ, સચોટ બાતમી અને સંકલિત કાર્યવાહી દ્વારા આ સંયુક્ત ઓપરેશનને અંજામ આપવામાં આવ્યો હતો, જેનાથી માત્ર 'સિગ્મા એન્ડ કંપની' ગેંગનો અંત આવ્યો, પણ બિહાર અને દિલ્હીમાં અપરાધ જગતમાં એક મોટો સંદેશ પણ પહોંચાડ્યો છે.