પટણા: બિહાર વિધાનસભાની ચૂંટણી માટે મહાગઠબંધન (RJD, કોંગ્રેસ અને અન્ય પક્ષો) આજે ગુરુવારે (23 ઓક્ટોબર) એક મોટી પ્રેસ કોન્ફરન્સ યોજવા જઈ રહ્યું છે, જેમાં મુખ્યમંત્રી પદના ઉમેદવારની સત્તાવાર જાહેરાત થવાની સંભાવના છે (તેજસ્વી યાદવનું નામ લગભગ નક્કી છે). જોકે, આ જાહેરાત પહેલાં જ મહાગઠબંધનમાંથી એક મોટી અને ચિંતાજનક અપડેટ મળી છે.
બેઠક વહેંચણીને લઈને ચાલી રહેલા લાંબા ઝઘડા બાદ, મહાગઠબંધનમાં સામેલ RJD અને કૉંગ્રેસે એવી છ બેઠકો પરથી તેમના ઉમેદવારો પાછા નહીં ખેંચવાનો નિર્ણય કર્યો છે, જ્યાં આ મુદ્દો વણઉકેલાયેલો રહ્યો છે. સૂત્રોના જણાવ્યા મુજબ, આ 'મૈત્રીપૂર્ણ સ્પર્ધા' (Friendly Contest) હવે હકીકતમાં એકબીજાની સામેની સીધી ટક્કરમાં પલટાશે.
બંને પક્ષોએ સિકંદરા, કહલગાંવ, સુલતાનગંજ, વૈશાલી, લાલગંજ અને વારીસાલીગંજ જેવી 6 મહત્ત્વની બેઠકો પર એકબીજા સામે ઉમેદવારો ઊભા રાખ્યા છે, અને હવે તેઓ તેમને પાછા ખેંચશે નહીં.
જુઓ કઈ બેઠક પર કોણ સામસામે:
 બેઠક  RJD ઉમેદવાર  કૉંગ્રેસ ઉમેદવાર
 સિકંદરા:  ઉદય નારાયણ ચૌધરી -વિનોદ ચૌધરી
 કહલગાંવ:  રજનીશ ભારતી -પ્રવીણ કુમાર કુશવાહા
 સુલતાનગંજ:  ચંદન સિંહા -લાલન યાદવ
 વૈશાલી : અજય કુશવાહા -સંજીવ સિંહ
 લાલગંજ:  શિવાની શુક્લા -આદિત્ય કુમાર
 વારિસલીગંજ:  અનિતા -સતીશ કુમાર
બિહાર વિધાનસભાની ચૂંટણી બે તબક્કામાં યોજાવાની છે. પ્રથમ તબક્કાનું મતદાન 6 નવેમ્બરે અને બીજા તબક્કાનું મતદાન 11 નવેમ્બરે થશે, જ્યારે પરિણામો 14 નવેમ્બરે જાહેર કરવામાં આવશે. મહાગઠબંધન માટે આંતરિક વિખવાદ અને ઉમેદવારોનો આ 'મૈત્રીપૂર્ણ' ટકરાવ કેટલો નુકસાનકારક સાબિત થાય છે, તે જોવું રસપ્રદ રહેશે.