નવી દિલ્હી: મલેશિયાના પ્રધાનમંત્રી અનવર ઇબ્રાહિમે બુધવારે પુષ્ટિ કરી કે પ્રધાનમંત્રી નરેન્દ્ર મોદી આ મહિનાના અંતમાં કુઆલાલંપુરમાં યોજાનારી 47મી આસિયાન સમિટમાં વ્યક્તિગત રીતે હાજર નહીં રહે. જોકે, પીએમ મોદી ભારતમાં ચાલી રહેલી દિવાળીની ઉજવણીને કારણે સમિટમાં વર્ચ્યુઅલી (virtually) હાજરી આપશે.
અનવર ઇબ્રાહિમે પીએમ મોદીના સહયોગી સાથેની વાતચીત બાદ આ માહિતી આપી અને ભારતના નિર્ણયનું સન્માન કરતાં તમામ ભારતીયોને દિવાળીની શુભકામનાઓ પાઠવી હતી.
વડા પ્રધાન નરેન્દ્ર મોદીએ પણ ટ્વીટ કરીને મલેશિયાના પીએમ અનવર ઇબ્રાહિમ સાથે થયેલી ઉષ્માભરી વાતચીતની માહિતી આપી. પીએમ મોદીએ કહ્યું, "હું આસિયાન-ભારત સમિટમાં વર્ચ્યુઅલી હાજરી આપવા અને આસિયાન-ભારત વ્યાપક વ્યૂહાત્મક ભાગીદારીને વધુ ગાઢ બનાવવા માટે આતુર છું."
અનવર ઇબ્રાહિમે જણાવ્યું કે, તેમણે અને પીએમ મોદીના સહયોગીએ મલેશિયા-ભારત દ્વિપક્ષીય સંબંધોને વધુ વ્યૂહાત્મક અને વ્યાપક સ્તરે મજબૂત કરવાના પ્રયાસો અંગે ચર્ચા કરી. ભારત વેપાર, રોકાણ, ટેકનોલોજી, શિક્ષણ અને પ્રાદેશિક સુરક્ષાના ક્ષેત્રોમાં મલેશિયાનો મહત્ત્વપૂર્ણ ભાગીદાર છે.
નોંધનીય છે કે આ 47મી આસિયાન સમિટમાં યુએસ પ્રમુખ ડોનાલ્ડ ટ્રમ્પ પણ હાજરી આપવા માટે મલેશિયાની મુલાકાત લેશે. ટ્રમ્પ મલેશિયા ઉપરાંત દક્ષિણ કોરિયા અને જાપાનની પણ મુલાકાત લેશે, જ્યાં તેઓ ચીનના રાષ્ટ્રપતિ શી જિનપિંગ સાથે પણ મુલાકાત કરશે.
ભારત અને 10 સભ્ય દેશોના આસિયાન જૂથ (ઇન્ડોનેશિયા, મલેશિયા, ફિલિપાઇન્સ, સિંગાપોર, થાઇલેન્ડ, બ્રુનેઈ, વિયેતનામ, લાઓસ, મ્યાનમાર અને કંબોડિયા) વચ્ચેના સંબંધો 1992 માં શરૂ થયા હતા, જે 2012 માં વ્યૂહાત્મક ભાગીદારીમાં અપગ્રેડ કરવામાં આવ્યા હતા. આ સંબંધો વેપાર, રોકાણ, સુરક્ષા અને સંરક્ષણ પર કેન્દ્રિત છે.