ભોપાલ: મધ્યપ્રદેશના ભૂતપૂર્વ મુખ્યમંત્રી અને ભારતીય જનતા પાર્ટીના વરિષ્ઠ નેતા ઉમા ભારતીએ ભોપાલમાં એક પત્રકાર પરિષદ દરમિયાન ૨૦૨૯ની લોકસભા ચૂંટણીને લઈને એક મોટી ઈચ્છા વ્યક્ત કરી છે. તેમણે જાહેર કર્યું કે તેઓ ઉત્તર પ્રદેશની ઝાંસી લોકસભા બેઠક પરથી ચૂંટણી લડવા માંગે છે.
ઉમા ભારતીએ સ્પષ્ટ કર્યું કે, "જો મારો પક્ષ (ભાજપ) ઇચ્છશે, તો હું ઝાંસીથી ચૂંટણી લડવાનો ઇનકાર નહીં કરું."
ઉમા ભારતીએ જણાવ્યું કે, ઝાંસીની બેઠક તેમના માટે વિશેષ મહત્વ ધરાવે છે, કારણ કે તે તેમના જન્મસ્થળની નજીક આવેલી છે. તેઓ આ વિસ્તારમાં વિકાસ કાર્યોને આગળ ધપાવવા માંગે છે.
પત્રકાર પરિષદ દરમિયાન, તેમણે તેમના પ્રાથમિક એજન્ડા પર પણ ભાર મૂક્યો. તેમણે ગાય સેવાને પ્રોત્સાહન આપવાની અને પવિત્ર ગંગા નદીના સંરક્ષણની જરૂરિયાતનો પુનરોચ્ચાર કર્યો.
ઉમા ભારતીની આ જાહેરાતથી ૨૦૨૯ની ચૂંટણી માટે રાજકીય ગલિયારામાં ચર્ચાઓએ જોર પકડ્યું છે, કારણ કે તેમણે ખુલ્લેઆમ પોતાની ઈચ્છા અને કાર્યક્ષેત્રને જાહેર કરી દીધું છે.