બર્લિન, તા. ૨૪ : કેન્દ્રીય વાણિજ્ય અને ઉદ્યોગ પ્રધાન પીયૂષ ગોયલે શુક્રવારે બર્લિન ગ્લોબલ ડાયલોગમાં વિશ્વ સમુદાય સમક્ષ ભારતનું સ્પષ્ટ વલણ રજૂ કર્યું છે. તેમણે ભારપૂર્વક જણાવ્યું છે કે ભારત કોઈ પણ સંજોગોમાં દબાણ હેઠળ અથવા કોઈ સમયમર્યાદાના આધીન વેપાર કરારોમાં પ્રવેશ કરશે નહીં, અને તમામ નિર્ણયો માત્ર રાષ્ટ્રીય હિત દ્વારા સંચાલિત થશે.

"અમે માથા પર બંદૂક રાખીને સોદા કરતા નથી"
યુરોપિયન યુનિયન (EU), યુનાઇટેડ કિંગડમ (UK) અને યુનાઇટેડ સ્ટેટ્સ (US) સહિતના મુખ્ય ભાગીદારો સાથે ભારત મહત્ત્વપૂર્ણ વેપાર કરારો પર વાટાઘાટો કરી રહ્યું છે, તેવા સમયે ગોયલનંન આ નિવેદન ખૂબ જ મહત્ત્વપૂર્ણ છે.

ગોયલે સ્પષ્ટ શબ્દોમાં કહ્યું: "અમે ઉતાવળમાં" અથવા "માથા પર બંદૂક રાખીને" સોદા કરતા નથી. તેમણે ઉમેર્યું કે ભારત વેપાર નીતિમાં લાંબા ગાળાનો દૃષ્ટિકોણ રાખીને તેની સ્વાયત્તતા સાથે કોઈ સમાધાન કર્યા વિના ટેરિફ અને બજાર ઍક્સેસના પડકારોનું મૂલ્યાંકન કરે છે.
ગોયલે ભારતીય અર્થતંત્રમાં સ્થાનિક માંગના પ્રોત્સાહન અને નવા બજારોની શોધ પર ભાર મૂક્યો.

મિત્રોની પસંદગી સ્વતંત્ર: વૈશ્વિક પુરવઠા શૃંખલામાં સહકારની હાકલ
વાણિજ્ય મંત્રીએ ભારપૂર્વક જણાવ્યું કે ભારતની વૈશ્વિક ભાગીદારી સ્વતંત્ર નિર્ણય પર આધારિત છે. તેમણે કોઈ પણ દેશનું નામ લીધા વિના કહ્યું: "અમે ક્યારેય રાષ્ટ્રીય હિત સિવાયના કોઈપણ વિચારણાના આધારે અમારા મિત્રો કોણ હશે તે નક્કી કર્યું નથી. જો કોઈ મને કહે કે હું યુરોપિયન યુનિયન સાથે મિત્ર બની શકતો નથી, તો હું તે સ્વીકારીશ નહીં."

તેમણે વૈશ્વિક પુરવઠા શૃંખલાઓમાં સહકાર માટે હાકલ કરી અને કહ્યું કે બજારની પસંદગીઓ કોઈના પર લાદી શકાય નહીં.

ભારત હાલમાં ચીનના વિશ્વસનીય ઉત્પાદન વિકલ્પ તરીકે પોતાને સ્થાપિત કરવાનો પ્રયાસ કરી રહ્યું છે, પરંતુ પશ્ચિમી રાષ્ટ્રો ભારત પાસેથી વધુ બજાર ઍક્સેસ અને નિયમનકારી સુધારાઓની માંગ કરી રહ્યા છે. ગોયલે સ્પષ્ટ સંદેશ આપ્યો છે કે ભારત એક એવો વ્યૂહાત્મક ભાગીદાર છે જે જોડાવા માટે તૈયાર છે, પરંતુ માત્ર લાંબા ગાળાના લક્ષ્યોને અનુરૂપ શરતો પર જ.