નવી દિલ્‍હીઃ હવામાન વિભાગ અનુસાર દેશના દરિયાઈ ભાગો અરબ સાગર અને બંગાળની ખાડીમાં બે સિસ્ટમ બની છે. હવામાન ખાતા એ ચેતવણી આપી છે કે આના કારણે લક્ષદ્વીપ, કેરળ, કર્ણાટક, તમિલનાડુ અને આંધ્ર પ્રદેશમાં વરસાદ અને તેજ પવનોની સંભાવના છે. બંગાળની ખાડીમાં સર્જાઈ રહેલા લો દબાણના કારણે 27 ઓક્ટોબરથી ઓડિશા અને બંગાળમાં વાવાઝોડા 'મોંથા'નો ખતરો તોળાઈ રહ્યો છે. ઓડિશામાં ભારે વરસાદ થવાની સંભાવના છે.

આ બે સિસ્ટમમાંથી એક દક્ષિણ-પૂર્વ અરબ સાગરમાં બનેલું ડિપ્રેશન છે. આ ડિપ્રેશન છેલ્લા 3 કલાક દરમિયાન 25 કિમી પ્રતિ કલાકની ઝડપે ઉત્તર-ઉત્તર-પૂર્વ તરફ આગળ વધ્યું છે. આગામી 24 કલાક દરમિયાન તે પૂર્વ-મધ્ય અરબ સાગરમાં લગભગ ઉત્તર-ઉત્તર-પૂર્વ તરફ આગળ વધતું રહે તેવી સંભાવના છે. અરબ સાગરમાં બનેલા આ ડિપ્રેશનના કારણે લક્ષદ્વીપ, કેરળ અને તટીય કર્ણાટકના અમુક ભાગોમાં ભારે પવન સાથે વરસાદની આગાહી કરાઈ છે. માછીમારોને આગામી કેટલાક દિવસો સુધી દરિયામાં ન જવાની સલાહ આપવામાં આવી છે.

બીજી સિસ્ટમ તમિલનાડુના દરિયાકિનારા પાસે દક્ષિણ-પશ્ચિમ બંગાળની ખાડીમાં હાજર છે. દક્ષિણ-પૂર્વીય બંગાળની ખાડી પરનું આ લો પ્રેશર ક્ષેત્ર છેલ્લા 3 કલાક દરમિયાન ધીમે ધીમે પશ્ચિમ-ઉત્તર-પશ્ચિમ તરફ આગળ વધ્યું હતું અને 24 ઓક્ટોબર 2025 ના રોજ સવારે 0830 વાગ્યે IST પર તે જ વિસ્તારમાં સ્થિત હતું. હવામાન વિભાગે ચેતવણી આપી છે કે આ પ્રણાલી પશ્ચિમ-ઉત્તર-પશ્ચિમ તરફ આગળ વધશે અને વધુ મજબૂત બનશે. 26 ઓક્ટોબર સુધીમાં તે ડિપ ડિપ્રેશનમાં બદલાશે.

બંગાળની ખાડીમાં સર્જાઈ રહેલા લો દબાણના કારણે 27 ઓક્ટોબરથી ઓડિશામાં ભારે વરસાદ થવાની સંભાવના છે. જોકે વાવાઝોડાની સીધી અસર ઓડિશા પર નહીં પડે, પરંતુ રાજ્યમાં તીવ્ર પવનો અને ભારે વરસાદની સંભાવના વ્યક્ત કરવામાં આવી છે.

IMD ભુવનેશ્વરના ડિરેક્ટર મનોરમા મોહંતીએ જણાવ્યું હતું કે ઓડિશામાં 27, 28 અને 29 ઓક્ટોબરના રોજ ભારે વરસાદ થશે. હાલમાં રાજ્યમાં યલો એલર્ટ જાહેર કરવામાં આવ્યું છે. દક્ષિણ ઓડિશાના દરિયાકાંઠાના વિસ્તારોમાં 40-60 કિમી પ્રતિ કલાકની ઝડપે તીવ્ર પવનો ફૂંકાવાની સંભાવના છે. હવામાન વિભાગના જણાવ્યા અનુસાર આ વાવાઝોડું આંધ્ર પ્રદેશ તરફ આગળ વધી શકે છે.

ઓડિશામાં ચક્રવાતી તોફાનના સંભવિત ખતરાને ધ્યાનમાં રાખીને રાજ્યની આપત્તિ વ્યવસ્થાપન ટીમોને હાઇ એલર્ટ પર રાખવામાં આવી છે. રાજ્યના મહેસૂલ અને આપત્તિ વ્યવસ્થાપન મંત્રી સુરેશ પુજારીએ જણાવ્યું હતું કે સરકાર સંપૂર્ણ રીતે 28 કે 29 ઓક્ટોબરના સંભવિત વાવાઝોડા માટે તૈયાર છે. સ્વાસ્થ્ય, જળ સંસાધન, ઊર્જા અને કૃષિ વિભાગોને સતર્ક રહેવાનો આદેશ આપવામાં આવ્યો છે. જિલ્લા વહીવટીતંત્રે રાહત કેન્દ્રો, સ્થળાંતર અને જરૂરી સામગ્રીની વ્યવસ્થા કરી દીધી છે. તેમણે લોકોને અપીલ કરી છે કે ગભરાશો નહીં અને સરકારના નિર્દેશોનું પાલન કરો.

બંગાળની ખાડીમાં ઉત્પન્ન થનારા વાવાઝોડા 'મોંથા'ની અસરને કારણે કોલકાતા સહિત દક્ષિણ બંગાળના વિવિધ જિલ્લાઓમાં આગામી મંગળવારથી ભારે વરસાદની આગાહી જાહેર કરાઈ છે. રવિવારથી દક્ષિણ 24 પરગણા, પૂર્વ અને પશ્ચિમ મેદિનીપુર જિલ્લાઓમાં છૂટોછવાયો વરસાદ શરૂ થઈ શકે છે. મંગળવાર સુધીમાં વરસાદ વધુ તીવ્ર બનશે. કોલકાતા, હાવડા, હુગલી, ઉત્તર 24 પરગણા અને ઝાડગ્રામ જિલ્લાઓમાં પણ ભારે વરસાદની સંભાવના છે, જ્યાં પવનો 40 થી 60 કિલોમીટર પ્રતિ કલાકની ઝડપે ફૂંકાઈ શકે છે.

વાવાઝોડું આંધ્ર પ્રદેશ તરફ આગળ વધવાની સ્થિતિને જોતા તમિલનાડુના તુતીકોરિનમાં માછીમારી પર પ્રતિબંધ મૂકવામાં આવ્યો છે. અધિકારીઓએ માછીમારોને તાત્કાલિક કિનારે પાછા ફરવાની અને દરિયાકાંઠાના વિસ્તારોના લોકોને ચેતવણીઓ પર ધ્યાન આપવાની સલાહ આપી છે.