નવી દિલ્હી, તા. ૨૫ ઓક્ટોબર, ૨૦૨૫ : સોનાની કિંમતો તાજેતરમાં ₹૧.૩૦ લાખ પ્રતિ ૧૦ ગ્રામ ના આંકડાને સ્પર્શીને પાછી પડી હતી, અને છેલ્લા એક સપ્તાહમાં મોટી ગિરાવટ જોવા મળી હતી. ૧૭ ઓક્ટોબરના રોજ ₹૧.૩૦ લાખે પહોંચેલું સોનું હવે સસ્તું થઈને ₹૧.૨૨ લાખ પ્રતિ ૧૦ ગ્રામ પર આવી ગયું છે. આ ઘટાડાથી સામાન્ય લોકોમાં એવી આશા જાગી હતી કે સોનું નવેમ્બર સુધીમાં ₹૧ લાખની નીચે પણ જઈ શકે છે. જોકે, આ આશાઓ પર અમેરિકન અબજોપતિ રોકાણકાર રે ડાલિયોએ (Ray Dalio) ગંભીર ચેતવણી આપીને પાણી ફેરવી દીધું છે.
સોનાની કિંમતમાં મોટા ઉછાળાની સંભાવના
અમેરિકન અબજોપતિ રોકાણકાર રે ડાલિયોએ ચેતવણી આપી છે કે જે રીતે અમેરિકી રાષ્ટ્રપતિ ડોનાલ્ડ ટ્રમ્પ દ્વારા રશિયન તેલ પર પ્રતિબંધો લગાવવામાં આવી રહ્યા છે અને તેલ કંપનીઓને બેન કરીને સપ્લાય ચેઇનને પ્રતિબંધિત કરવામાં આવી રહી છે, તેનાથી આવનારા દિવસોમાં સોનાની કિંમતમાં મોટી તેજી જોવા મળી શકે છે.
ડાલિયોએ સોશિયલ મીડિયા પર દલીલ કરી કે રશિયાની બે તેલ કંપનીઓ Rosneft અને Lukoil પર લગાવવામાં આવી રહેલા પ્રતિબંધોનો હેતુ આર્થિક દબાણ વધારવાનો છે. પરંતુ આ પગલાંથી વૈશ્વિક તેલ પુરવઠા પર અસર થશે, જેના કારણે સોનાની કિંમતોમાં ઝડપી ઉછાળો આવી શકે છે.
ટ્રમ્પના નિર્ણયથી ડોલરની મજબૂતી જોખમાશે
ડાલિયોએ કહ્યું કે જ્યારે કોઈ દેશ પર આર્થિક પ્રતિબંધો લગાવવામાં આવે છે, ત્યારે તેની અસર તેની કરન્સી (કાગળની મુદ્રા) પર થાય છે, જેની માંગ ઘટે છે અને સોનાની કિંમતને પ્રોત્સાહન મળે છે.
ડાલિયોની દલીલ અનુસાર, આ પ્રતિબંધોથી ડોલરની મજબૂતી જોખમમાં મુકાઈ શકે છે. જ્યારે કોઈ દેશ પોતાના ઋણની ચુકવણી રોકે છે અથવા તેના પર પ્રતિબંધ મૂકે છે, ત્યારે તેની મુદ્રા અને દેવું બંને નબળા પડે છે. આ ચિંતા ત્યારે વધુ ગંભીર બને છે જ્યારે વાત દુનિયાની રિઝર્વ કરન્સી એટલે કે અમેરિકી ડોલરની હોય. આવી સ્થિતિમાં, સોનાની હોલ્ડિંગ અને કિંમત વધવા લાગે છે. સોનું નોન-ફિએટ કરન્સી (Non-Fiat Currency) હોવાથી, તેના પર દબાણ વધે છે અને કિંમતમાં મોટો ઉછાળો જોવા મળી શકે છે.
ભૂ-રાજકીય તણાવથી સોનું ફરી આકર્ષક
ડાલિયોએ કહ્યું કે હાલની સ્થિતિમાં રશિયન તેલ પર જે રીતે પ્રતિબંધો લગાવવામાં આવી રહ્યા છે, તેનાથી સોનાની સ્થિતિ પર દબાણ વધી શકે છે અને સોનું ફરી મોંઘું થઈ શકે છે.
જો અમેરિકી ફેડરલ રિઝર્વ આ મહિને વ્યાજ દરોમાં કાપ મૂકે અને ડોલર નબળો પડે, તો સોનું ફરીથી રોકાણ માટે સૌથી મજબૂત વિકલ્પ બની શકે છે. દુનિયાભરમાં ચાલી રહેલા યુદ્ધો, ભૂ-રાજકીય તણાવ, આર્થિક પ્રતિબંધો અને અસ્થિરતાને કારણે આવનારા મહિનાઓમાં ગોલ્ડ સેફ હેવન એસેટ તરીકે વધુ આકર્ષક બની શકે છે. આ કારણોસર, સોનાની કિંમતમાં ફરી મોટી તેજી આવવાની સંભાવના છે.