પૂર્ણિયા: બિહારના રાજકારણમાં એક ચોંકાવનારી ઘટના સામે આવી છે, જેમાં પૂર્ણિયાના સાંસદ પપ્પુ યાદવ ને આવકવેરા વિભાગ (Income Tax Department) તરફથી નોટિસ મળી છે. સાંસદે આક્ષેપ કર્યો છે કે આવકવેરા વિભાગે પૂર પીડિતોને રોકડ રકમનું વિતરણ કરવાના કાર્યને 'ગુનો' ગણાવ્યો છે.
પપ્પુ યાદવે શનિવારે સોશિયલ મીડિયા પર આ માહિતી શેર કરતાં લખ્યું "મને આવકવેરાની નોટિસ મળી છે, જેમાં પૂર પીડિતોને પૈસાનું વિતરણ કરવું ગુનો ગણાવ્યો છે. જો આ ગુનો છે, તો હું હંમેશા દરેક વંચિત પીડિતને મદદ કરવાનો ગુનો કરીશ."
થોડા અઠવાડિયા પહેલા પપ્પુ યાદવે વૈશાલી જિલ્લાના નયાગાંવ પૂર્વ પંચાયત હેઠળના મણિયારી ગામમાં પૂરગ્રસ્ત વિસ્તારોની મુલાકાત લીધી હતી. ગંગાના પૂરમાં ઘર અને મિલકત ગુમાવનારા લોકોને તેમણે આર્થિક સહાય (રોકડ રકમ) પૂરી પાડી હતી, જેનો વિડિયો વાયરલ થયો હતો.
 વિધાનસભા ચૂંટણીની જાહેરાત થઈ ગઈ હોવાથી, રોકડ રકમનું વિતરણ કરવા બદલ તેમની સામે વૈશાલી જિલ્લામાં આચારસંહિતાના ઉલ્લંઘન બદલ કેસ પણ દાખલ કરવામાં આવ્યો હતો.
પપ્પુ યાદવે પૂર પીડિતોને મદદ ન કરવા બદલ ગૃહ રાજ્યમંત્રી (નિત્યાનંદ રાય) અને સ્થાનિક સાંસદ (ચિરાગ પાસવાન) પર પણ સવાલ ઉઠાવ્યા હતા. તેમણે પૂછ્યું કે જો તેમણે મદદ ન કરી હોત, તો શું તેઓ ગૃહ રાજ્યમંત્રી અને સ્થાનિક સાંસદની જેમ મૂક પ્રેક્ષક બનીને રહ્યા હોત?
આવકવેરાની નોટિસથી રાજકારણ ગરમાયું છે અને પપ્પુ યાદવ આ મુદ્દાને ગરીબોની મદદ અને સરકારી દમન સામેના લડત તરીકે રજૂ કરી રહ્યા છે.