પટણા: ૨૦૨૫ની બિહાર વિધાનસભા ચૂંટણીમાં હવે લોકસભામાં વિપક્ષના નેતા રાહુલ ગાંધીની ધમાકેદાર એન્ટ્રી થવા જઈ રહી છે. અત્યાર સુધી રાષ્ટ્રીય સ્તરના પ્રચારકોની ગેરહાજરીના સવાલો વચ્ચે, રાહુલ ગાંધી આગામી ૨૯ ઓક્ટોબરે રાષ્ટ્રીય જનતા દળ (RJD)ના નેતા તેજસ્વી યાદવ સાથે બે મોટી સંયુક્ત રેલીઓ કરશે.

રાહુલ ગાંધીની ચૂંટણી જાહેર થયા પછી રાજ્યમાં આ પ્રથમ રેલી હશે, જે વિપક્ષી 'ઇન્ડિયન બ્લોક' (મહાગઠબંધન)ની એકતાનું સૌથી મોટું પ્રદર્શન માનવામાં આવી રહ્યું છે.
રાહુલ ગાંધી અને તેજસ્વી યાદવની આ પ્રથમ સંયુક્ત રેલીઓ મુઝફ્ફરપુર અને દરભંગામાં યોજાશે, જે પરંપરાગત રીતે NDA (નેશનલ ડેમોક્રેટિક એલાયન્સ)નો ગઢ ગણાય છે. રાજકીય વિશ્લેષકો માને છે કે આ વ્યૂહાત્મક પગલું NDAના મજબૂત વિસ્તારોમાં સીધો પ્રહાર કરવાની તૈયારી છે.
રાહુલ ગાંધીની ગેરહાજરી એક મુખ્ય મુદ્દો બની હતી, પરંતુ હવે છઠ પૂજા પૂરી થતાં જ કોંગ્રેસે પ્રચારને તેજ બનાવવાની યોજના બનાવી છે. કોંગ્રેસના ૪૦ સ્ટાર પ્રચારકોની યાદીમાં સોનિયા ગાંધી, પ્રિયંકા ગાંધી વાડ્રા, મલ્લિકાર્જુન ખડગે અને સચિન પાયલટ જેવા મોટા નામોનો સમાવેશ થાય છે, જે સ્પષ્ટ સંકેત આપે છે કે પાર્ટી હવે પૂરી તાકાત સાથે મેદાનમાં ઉતરી રહી છે.
અત્યાર સુધી તેજસ્વી યાદવ એકલા હાથે પ્રચારનું નેતૃત્વ કરી રહ્યા હતા અને રોજગાર, સ્થળાંતર અને કાયદો અને વ્યવસ્થા જેવા પાયાના મુદ્દાઓ પર સરકાર પર સતત પ્રહાર કરી રહ્યા હતા.
 રાહુલનો ફોકસ: તાજેતરમાં, રાહુલ ગાંધીએ તહેવારોના સમયમાં બિહાર જતી ટ્રેનોમાં ભારે ભીડને લઈને કેન્દ્ર સરકાર પર નિશાન સાધ્યું હતું, જે રાષ્ટ્રીય પરિપ્રેક્ષ્યમાં સ્થાનિક મુદ્દાઓને જોડે છે.
વિશ્લેષકોનું માનવું છે કે તેજસ્વીના પાયાના મુદ્દાઓ અને રાહુલના રાષ્ટ્રીય અનુભવનું આ સંયોજન NDA માટે એક મજબૂત પડકાર ઊભો કરી શકે છે. જોકે, ચૂંટણીને હવે બે અઠવાડિયાથી ઓછો સમય બાકી છે, ત્યારે આ સંયુક્ત રેલીઓ મતદારોને કેટલી અસર કરે છે તે જોવું રસપ્રદ રહેશે