નવી દિલ્‍હી, તા.૨૭: ટેલિકોમ કંપની વોડાફોન આઈડિયા (Vi)ને મોટી રાહત મળી. સુપ્રીમ કોર્ટે સોમવારે કેન્‍દ્ર સરકારને કંપનીના રૂ.૫,૬૦૬ કરોડના AGR બાકી રકમ પર પુનર્વિચાર કરવાની મંજૂરી આપી. આ બાકી રકમ નાણાકીય વર્ષ ૨૦૧૬-૧૭ ની છે. કોર્ટે જણાવ્‍યું હતું કે આ મામલો સરકારનો નીતિગત નિર્ણય છે અને તે તેના પર પુનર્વિચાર કરી શકે છે. એડજસ્‍ટેડ ગ્રોસ રેવન્‍યુ (AGR) એ ટેલિકોમ કંપનીઓની આવક છે જેના આધારે સરકાર લાઇસન્‍સ ફી અને સ્‍પેક્‍ટ્રમ ચાર્જ વસૂલ કરે છે.

સુપ્રીમ કોર્ટે વોડાફોન આઈડિયા દ્વારા દાખલ કરાયેલી અરજીની સુનાવણી કરતી વખતે આ આદેશ આપ્‍યો. કંપનીએ ટેલિકોમ્‍યુનિકેશન વિભાગ (DoT) દ્વારા કરવામાં આવેલી નવી AGR માંગણીઓને પડકારી. કંપનીએ દલીલ કરી હતી કે આ નવી માંગણીઓ ગેરવાજબી છે, કારણ કે સુપ્રીમ કોર્ટે ૨૦૧૯ ના તેના નિર્ણયમાં કુલ બાકી રકમ નક્કી કરી દીધી હતી. સુનાવણી દરમિયાન, કેન્‍દ્ર સરકારનું પ્રતિનિધિત્‍વ કરતા સોલિસિટર જનરલ તુષાર મહેતાએ કોર્ટને માહિતી આપી હતી કે સરકાર હવે વોડાફોન આઈડિયામાં ૪૯% હિસ્‍સો ધરાવે છે અને આશરે ૨૦૦ મિલિયન ગ્રાહકો કંપનીની સેવાઓ પર આધાર રાખે છે.

કંપનીના શેરઃ તેમણે જણાવ્‍યું હતું કે આ સંજોગોને ધ્‍યાનમાં રાખીને, કેન્‍દ્ર સરકાર તેના ગ્રાહકોના હિતોનું રક્ષણ કરવા માટે કંપની દ્વારા ઉઠાવવામાં આવેલા મુદ્દાઓ પર પુનર્વિચાર કરવા તૈયાર છે. વોડાફોન આઈડિયાએ જણાવ્‍યું હતું કે તે આ મુદ્દાને ઉકેલવા માટે ટેલિકોમ્‍યુનિકેશન વિભાગ સાથે કામ કરવા તૈયાર છે. BSE ને ફાઇલિંગમાં, કંપનીએ સુપ્રીમ કોર્ટના નિર્દેશને સકારાત્‍મક વિકાસ તરીકે વર્ણવ્‍યો હતો. કોર્ટે સરકારને AGR-સંબંધિત મુદ્દાઓ અંગે કંપનીની ફરિયાદો પર વિચાર કરવાની મંજૂરી આપી છે. અમે આ મામલાને ઉકેલવા માટે ટેલિકોમ્‍યુનિકેશન વિભાગ સાથે કામ કરવા આતુર છીએ.

સોમવારે ટ્રેડિંગ દરમિયાન કંપનીનો શેર ચાર ટકા વધ્‍યો. તે BSE પર ૩.૮૫% વધીને રૂ.૯.૯૯ પર બંધ થયો. ટ્રેડિંગ દરમિયાન, તે ૫૨-સપ્તાહના ઉચ્‍ચતમ સ્‍તરે પહોંચ્‍યો. આ સાથે, કંપનીનું માર્કેટ કેપ રૂ.૧,૦૮,૨૩૪.૬૯ કરોડ પર પહોંચી ગયું છે. તેની ૫૨-સપ્તાહની ઉચ્‍ચતમ રૂ.૧૦.૫૭ છે અને તેની સૌથી નીચી રૂ.૬.૧૨ છે.