બંગાળની ખાડીમાં ઉદભવેલા ચક્રવાતીય વાવાઝોડા ‘મોન્થા’ના ગંભીર સ્વરૂપ ધારણ કરવાની આશંકા વચ્ચે કેન્દ્ર સરકારે રેલવેના સંચાલન, મુસાફરોની સુરક્ષા અને આપત્તિ પ્રતિભાવની તૈયારીઓની સઘન સમીક્ષા કરી છે. કેન્દ્રીય રેલવે મંત્રીએ એક ઉચ્ચ સ્તરીય બેઠકમાં રેલવે અધિકારીઓ, આપત્તિ વ્યવસ્થાપન એજન્સીઓ અને સ્થાનિક વહીવટીતંત્ર સાથેના સંકલનની સ્થિતિ વિશે માહિતી મેળવી છે.

બેઠકમાં મુસાફરોની સુરક્ષા, રેલ નિયમન, પુનર્સ્થાપન યોજના, સંચાર વ્યવસ્થા અને આપત્તિ પ્રતિભાવ સંબંધિત વિવિધ મુદ્દાઓની સમીક્ષા કરવામાં આવી હતી. મંત્રીએ અધિકારીઓને નિર્દેશ આપ્યા છે કે ચક્રવાતની સંભવિત અસરને ધ્યાનમાં રાખીને આંધ્ર પ્રદેશ, ઓડિશા અને તેલંગાણાના પૂર્વીય તટ પર તમામ જરૂરી સાવચેતીઓ સમયસર સુનિશ્ચિત કરવામાં આવે. રેલવે મંત્રીએ સ્પષ્ટ કર્યું કે, "પ્રાથમિકતા મુસાફરોની સલામતી અને સેવા સાતત્ય છે. આપણે ખાતરી કરવી જોઈએ કે ચક્રવાત દરમિયાન કોઈ જાનહાનિ કે મોટું નુકસાન ન થાય અને આવશ્યક સેવાઓ ઝડપથી પુનઃસ્થાપિત કરવા માટે તૈયારીઓ પૂર્ણ કરવામાં આવે."

મંત્રીએ તમામ સંબંધિત રેલવે ઝોનને હાઈ એલર્ટ પર રહેવાનો આદેશ આપ્યો છે. તેમણે રેલ સેવાઓની ઝડપી પુનર્સ્થાપના અને અવિરત સંચાર વ્યવસ્થા સુનિશ્ચિત કરવા માટે આપત્તિ પ્રતિભાવ ટીમોની અગ્રિમ તૈનાતી માટે કહ્યું છે. ભારતીય રેલવેએ “વાસ્તવિક સમય સંકલન અને પ્રતિભાવ પ્રણાલી” હેઠળ પોતાના વિભાગીય વાર રૂમ્સને સક્રિય કર્યા છે. આ કક્ષો ચક્રવાતની સ્થિતિ અને રેલવે પરિચાલન પર તેની અસરની સતત દેખરેખ રાખી રહ્યા છે.

ખાસ કરીને વિજયવાડા, વિશાખાપટ્ટનમ અને ગુંટૂર વિભાગોમાં જરૂરી સામગ્રી, મશીનરી અને માનવશક્તિ તૈયાર રાખવામાં આવી છે. પૂર્વ તટ રેલવે, દક્ષિણ તટ રેલવે અને દક્ષિણ મધ્ય રેલવે ઝોનને કટોકટી સંસાધનો એકઠા કરવા, વીજળી અને સિગ્નલિંગ સિસ્ટમની સુરક્ષા સુનિશ્ચિત કરવા તથા પાણી ભરાવાની સ્થિતિનો સામનો કરવા માટે તમામ આવશ્યક પગલાં લેવા જણાવાયું છે.

 રેલવે મંત્રાલયે મુસાફરોની સુવિધા અને સુરક્ષા માટે અગ્રિમ માહિતી તંત્ર સક્રિય કર્યું છે. ટ્રેન સંચાલન સંબંધિત માહિતી સોશિયલ મીડિયા, સ્ટેશન ઘોષણાઓ અને રેલવે હેલ્પલાઇન દ્વારા નિયમિતપણે આપવામાં આવી રહી છે. તમામ ઝોનલ અને ડિવિઝનલ અધિકારીઓને NDRF, SDMA અને પોલીસ પ્રશાસન સાથે સતત સંપર્કમાં રહેવા માટે કહેવામાં આવ્યું છે.

પૂર્વીય તટીય રેલવેના મહાપ્રબંધક પરમેશ્વર ફુંકવાલ દ્વારા મંત્રીને વાલ્ટેયર અને ખુર્દા રોડ મંડળોમાં શરૂ કરાયેલા એહતીયાતી પગલાંની વિગતવાર માહિતી આપી હતી. આ વિસ્તારોમાં રેલ પાટા, પુલો અને ઓવરહેડ વાયરિંગની સુરક્ષા માટે ટીમો તૈનાત કરવામાં આવી છે. જરૂરિયાત મુજબ રેલ સેવાઓના અસ્થાયી સ્થગન અથવા માર્ગ પરિવર્તન માટેની યોજનાઓ પણ તૈયાર કરવામાં આવી છે.

ભારતીય રેલવેએ પોતાની આપત્તિ પ્રતિભાવ દળોને સ્ટેન્ડબાય મોડ પર રાખ્યા છે. આમાં એન્જિનિયરિંગ, ટ્રેક, OHE, સિગ્નલિંગ અને મેડિકલ યુનિટ્સનો સમાવેશ થાય છે. આ દળો અસરગ્રસ્ત વિસ્તારોમાં તાત્કાલિક રાહત અને પુનર્સ્થાપનાનું કાર્ય શરૂ કરશે. રેલવે મંત્રીએ કહ્યું, "રેલવેનો ધ્યેય ફક્ત સેવા પુનઃસ્થાપિત કરવાનો નથી, પરંતુ જાહેર સલામતી સુનિશ્ચિત કરવાનો છે. દરેક સ્તરે સંકલન અને સમયસર કાર્યવાહી આ આપત્તિનો સામનો કરવાની ચાવી હશે."