રૂ.૨૫,૮૮,૫૦,૭૦,૦૦,૦૦૦ સ્વાહા...ઝકરબર્ગે આખા વર્ષની કમાણી ૧ દિવસમાં ગુમાવી
ગુરુવારે વિશ્વના ટોચના ૨૦ ધનિકોમાંથી ૧૭ લોકોની કુલ સંપત્તિમાં ઘટાડો થયો : માર્ક ઝકરબર્ગને સૌથી મોટું નુકસાન : વિશ્વના સૌથી ધનિક લોકોની યાદીમાં બે સ્થાન નીચે સરકીને પાંચમા સ્થાને પહોંચી ગયાઃ મુકેશ અંબાણી અને ગૌતમ અદાણીની કુલ સંપત્તિમાં પણ ઘટાડો
નવી દિલ્હી, તા.૩૧: ગુરુવારે વિશ્વભરના શેરબજારોમાં ઘટાડો થયો, જેના કારણે વિશ્વના ટોચના ૧૦ ધનિકોમાંથી ૧૭ લોકોની કુલ સંપત્તિમાં ઘટાડો થયો. માર્ક ઝકરબર્ગને સૌથી મોટું નુકસાન સહન કરવો પડ્યો. વિશ્વની સૌથી મોટી સોશિયલ મીડિયા કંપની ફેસબુકની પેરેન્ટ કંપની મેટા પ્લેટફોર્મ્સના શેરમાં ગુરુવારે ૧૧ ટકાથી વધુનો ઘટાડો થયો. આના પરિણામે કંપનીના CEO ઝકરબર્ગની કુલ સંપત્તિમાં $૨૯.૨ બિલિયન અથવા આશરે રૂ.૨૫,૮૮,૫૦,૭૦,૦૦,૦૦૦ નો ઘટાડો થયો. આ સાથે, તેમની કુલ સંપત્તિ હવે ઘટીને $૨૩૫ બિલિયન થઈ ગઈ છે, જે તેમને ધનિકોની યાદીમાં ત્રીજા સ્થાનેથી પાંચમા સ્થાને પહોંચાડી દે છે. આ વર્ષે તેમની કુલ સંપત્તિમાં $૨૮ બિલિયનનો વધારો થયો છે.
બ્લૂમબર્ગ બિલિયોનેર્સ ઇન્ડેક્સ અનુસાર, વિશ્વના સૌથી ધનિક વ્યક્તિ એલોન મસ્કે ગુરુવારે $૧૫.૩ બિલિયન ગુમાવ્યા, જેના કારણે તેમની કુલ સંપત્તિ $૪૫૭ બિલિયન રહી ગઈ. ઓરેકલના સ્થાપક લેરી એલિસને $૧૯.૮ બિલિયન ગુમાવ્યા અને તેઓ $૩૧૭ બિલિયન સાથે બીજા સ્થાને રહ્યા. જેફ બેઝોસે $૬.૬ બિલિયન ગુમાવ્યા, પરંતુ લેરી પેજે $૫.૩૧ બિલિયનનો વધારો કર્યો, જેનાથી તેઓ ધનિકોની યાદીમાં ચોથા સ્થાને પહોંચી ગયા. પેજની કુલ સંપત્તિ $૨૪૪ બિલિયન સુધી પહોંચી ગઈ છે, જેનાથી તેઓ બેઝોસ ($૨૪૬ બિલિયન) થી પાછળ રહી ગયા છે.
અંબાણી-અદાનીની સ્થિતિ
આ યાદીમાં, સેર્ગેઈ બ્રિન ($૨૨૮ બિલિયન) છઠ્ઠા, બર્નાર્ડ આર્નોલ્ટ ($૧૯૪ બિલિયન) સાતમા, સ્ટીવ બાલ્મર ($૧૮૧ બિલિયન) આઠમા, જેન્સન હુઆંગ ($૧૭૬ બિલિયન) નવમા અને માઈકલ ડેલ ($૧૬૫ બિલિયન) દસમા ક્રમે છે. સ્થાનિક બજારમાં ઘટાડાને કારણે મુકેશ અંબાણી ($૧૦૪ બિલિયન) અને ગૌતમ અદાણી ($૯૨.૭ બિલિયન) ની નેટવર્થમાં પણ ઘટાડો થયો. અંબાણીની નેટવર્થમાં ૧.૬ બિલિયન ડોલર અને અદાણીની ૨૧૨ મિલિયન ડોલરનો ઘટાડો થયો. જોકે, ટોચના ૨૦ ધનિક લોકોમાં આ વર્ષે ફક્ત બિલ ગેટ્સની નેટવર્થમાં ઘટાડો થયો છે. તેમણે ૩૯.૫ બિલિયન ડોલર ગુમાવ્યા છે.
(10:33 AM IST)
છેલ્લા 8 દિવસમાં સૌથી લોકપ્રિય 
