ભારત અને ઇઝરાયલે સંરક્ષણ સહયોગમાં નોંધપાત્ર પ્રગતિ કરી છે. બંને દેશો વચ્ચે 17મી સંયુક્ત કાર્યકારી જૂથ (JWG) ની બેઠક તેલ અવીવમાં યોજાઈ હતી, જ્યાં અનેક મુખ્ય મુદ્દાઓ પર સર્વસંમતિ સધાઈ હતી. આ બેઠકની સહ-અધ્યક્ષતા ભારતના સંરક્ષણ સચિવ રાજેશ કુમાર સિંહ અને ઇઝરાયલના સંરક્ષણ મંત્રાલયના મહાનિર્દેશક મેજર જનરલ (રિઝર્વ) અમીર બારામ દ્વારા કરવામાં આવી હતી. બેઠક દરમિયાન, બંને દેશોએ સંરક્ષણ સહયોગ પર એક નવા સમજૂતી કરાર (MoU) પર હસ્તાક્ષર કર્યા, જે ભવિષ્યમાં સંરક્ષણ ભાગીદારીને વધુ મજબૂત બનાવશે.

આ કરાર હેઠળ, ભારત અને ઇઝરાયલ હવે અદ્યતન ટેકનોલોજી શેર કરશે, સંયુક્ત રીતે નવી શસ્ત્ર પ્રણાલીઓ વિકસાવશે અને તેનું ઉત્પાદન કરશે, અને કૃત્રિમ બુદ્ધિ, સાયબર સુરક્ષા અને સંશોધન અને વિકાસ જેવા ક્ષેત્રોમાં સાથે મળીને કામ કરશે. બેઠકમાં, બંને પક્ષોએ આજ સુધીના તેમના સહયોગના નોંધપાત્ર ફાયદાઓનો સ્વીકાર કર્યો. આતંકવાદ જેવા સહિયારા પડકારોનો સામનો કરવા માટે સાથે મળીને કામ કરવા પર પણ ભાર મૂકવામાં આવ્યો. વિશ્વાસ અને સહિયારા સુરક્ષા હિતો પર આધારિત ભારત અને ઇઝરાયલની સંરક્ષણ ભાગીદારી વધુ ગાઢ બની રહી છે.

ભારતના રાષ્ટ્રીય સુરક્ષા સલાહકાર અજિત ડોભાલ અને ઇઝરાયલના વિદેશ પ્રધાન ગિડીઓન સાર વચ્ચે મંગળવારે દિલ્હીમાં એક મહત્વપૂર્ણ બેઠક યોજાઈ હતી. બંને નેતાઓએ આતંકવાદ સામે લડવા અને સહિયારા સુરક્ષા પડકારો પર સહયોગ વધારવા અંગે ચર્ચા કરી હતી. ગિડીઓન સાર સોશિયલ મીડિયા પ્લેટફોર્મ X પર લખ્યું, "ભારતના NSA અજિત ડોભાલને મળવાનું સન્માન છે

તેમણે કહ્યું, "અમે સામાન્ય પડકારો, ખાસ કરીને આતંકવાદ સામે લડવાના માર્ગો પર ચર્ચા કરી. અમે ભારત અને ઇઝરાયલ વચ્ચે લાંબા સમયથી ચાલતી વ્યૂહાત્મક ભાગીદારીને વધુ મજબૂત બનાવી રહ્યા છીએ. આ બેઠકે ભારત અને ઇઝરાયલ વચ્ચે સુરક્ષા, આતંકવાદ વિરોધી સહયોગ અને વ્યૂહાત્મક ભાગીદારીને નવી દિશા આપી."