નવી દિલ્હી: ભારતે અમેરિકા દ્વારા ભારતીય માલ પર ટેરિફમાં વધારો કરવાના નિર્ણય સામે પોતાની વ્યૂહરચનાના ભાગરૂપે લેટિન અમેરિકન દેશો સાથે વેપાર જોડાણ મજબૂત કરવાનું શરૂ કર્યું છે. ભારતે તાજેતરમાં પેરુ અને ચિલી સાથે વેપાર કરાર વાટાઘાટોના મુખ્ય રાઉન્ડ સફળતાપૂર્વક પૂર્ણ કર્યા છે, જે નિકાસ બજારોમાં વૈવિધ્યકરણ લાવવા અને યુએસ બજાર પરની નિર્ભરતા ઘટાડવાના પ્રયાસનો એક ભાગ છે.

પેરુના લિમામાં ૩ થી ૫ નવેમ્બર દરમિયાન યોજાયેલા નવમા રાઉન્ડની વાટાઘાટોમાં, માલ અને સેવાઓમાં વેપાર, મૂળના નિયમો, વિવાદ સમાધાન અને મહત્વપૂર્ણ ખનિજો સહિતના મુખ્ય પ્રકરણોમાં નોંધપાત્ર પ્રગતિ જોવા મળી છે. પેરુના વિદેશ વેપાર મંત્રીએ જણાવ્યું કે આ કરારથી વેપાર અને રોકાણના પ્રવાહને વેગ મળશે. ભારતીય રાજદૂતે ફાર્માસ્યુટિકલ્સ, ઓટોમોબાઇલ્સ અને કાપડ જેવા ક્ષેત્રોમાં સહયોગની નવી તકો ઊભી થવાની આશા વ્યક્ત કરી છે. બંને પક્ષો જાન્યુઆરી ૨૦૨૬ માં નવી દિલ્હીમાં આગામી રાઉન્ડ યોજવા સંમત થયા છે.

ક્રિટિકલ મિનરલ્સ પર ફોકસ: યુએસ દ્વારા 27 ઓગસ્ટથી ભારતીય માલ પર 50% સુધીની ડ્યુટી લાદવામાં આવ્યા બાદ ભારતે આ પગલું ભર્યું છે. લેટિન અમેરિકા, જેમાં તાંબુ અને લિથિયમ જેવા મહત્વપૂર્ણ ખનિજોનો સમૃદ્ધ ભંડાર છે, તે ભારતની ઔદ્યોગિક અને ઊર્જા સુરક્ષાની જરૂરિયાતો સાથે સુસંગત છે. નિષ્ણાતો માને છે કે પેરુ, ચિલી અને મેક્સિકો મળીને યુએસમાં થતી ભારતની નિકાસના ૨૦% જેટલા માલ (આશરે $૧૭.૩ બિલિયન) ને શોષી શકે છે.

ચિલીના સેન્ટિયાગોમાં પણ ૨૭ થી ૩૦ ઓક્ટોબર દરમિયાન વ્યાપક આર્થિક ભાગીદારી કરાર (CEPA) પર વાટાઘાટોનો ત્રીજો રાઉન્ડ યોજાયો હતો, જેમાં માલ, સેવાઓ, રોકાણ પ્રમોશન અને બૌદ્ધિક સંપદા અધિકારોનો સમાવેશ થાય છે. આ જોડાણ દ્વારા ભારત લેટિન અમેરિકન ક્ષેત્ર સાથે મજબૂત ભાગીદારી બનાવવા પર વ્યૂહાત્મક ધ્યાન કેન્દ્રિત કરી રહ્યું છે.