૨૦૨૫માં અમેરિકાએ ૮૦,૦૦૦ લોકોના ચાલુ વિઝા કેન્સલ કરી દીધા
યુએસમાં કોઈ ક્રાઈમ કરનારા કે પછી ઓવરસ્ટે થઈ ગયા હોય તેવા સ્ટૂડન્ટ્સ ઉપરાંત વિઝિટર્સના વિઝા કેન્સલ કરીને ડિપોર્ટ કરાયા
વોશીંગ્ટન તા.૭: હાલ ભલે અમેરિકામાં રહેતા ઈલીગલ ઈમિગ્રન્ટ્સ સામે સખ્ત કાર્યવાહી ચાલી રહી હોય પણ જેમની પાસે યુએસના વેલિડ વિઝા છે તેવા પણ હજારો લોકોને વિઝા કેન્સલ કરી અમેરિકા છોડવાની ફરજ પાડવામાં આવી છે. ટ્રમ્પે જાન્યુઆરી ૨૦ના રોજ સત્તા સંભાળી ત્યારથી અત્યારસુધીમાં ૮૦ હજાર લોકોના ચાલુ વિઝા રદ કરવામાં આવ્યા હોવાનું સ્ટેટ ડિપાર્ટમેન્ટ દ્વારા જણાવાયું છે.
જે લોકોના વિઝા કેન્સલ કરવામાં આવ્યા છે તેમાં દારૂ પીને ડ્રાઈવ કરવાથી લઈને કોઈના પર અટેક ઉપરાંત ચોરી જેવા ગુનામાં પકડાયા હોય કે દોષિત ઠર્યા હોય તેવા લોકોનો સમાવેશ થાય છે. વિઝા કેન્સલ થાય તેમને વોલન્ટરી ડિપાર્ચર લેવાનો ઓપ્શન આપવામાં આવતો હોય છે અને જે લોકો સીધી રીતે અમેરિકા નહીં છોડે તેવું લાગે તેમને કસ્ટડીમાં લઈ ડિપોર્ટ કરાતા હોય છે.
જે ૮૦ હજાર વિઝા કેન્સલ કરાયા છે તેમાં ૧૬ હજાર લોકો સામે દારૂ પીને ડ્રાઈવ કરવાના ગુનામાં આ કાર્યવાહી કરવામાં આવી હતી જ્યારે ૧૨ હજાર લોકોને મારામારીના ગુનામાં અને આઠ હજારને ચોરીના કેસમાં વિઝા કેન્સલ કરીને અમેરિકાની બહાર મોકલી દેવાયા હતા. સ્ટેટ ડિપાર્ટમેન્ટના એક અધિકારીના જણાવ્યા અનુસાર અડધોઅડધ વિઝા હોલ્ડરનું સ્ટેટસ આ ત્રણ ક્રાઈમમાં રદ કરવામાં આવ્યું છે.
આ પહેલા ઓગસ્ટમાં સરકાર દ્વારા એવું જણાવાયું હતું કે સાત મહિનામાં છ હજાર જેટલા સ્ટૂડન્ટ્સના વિઝા રદ કરવામાં આવ્યા છે. તેમાં મોટાભાગના લોકો ઓવરસ્ટે થનારા કે પછી કોઈ પ્રકારનો ગુનો કરનારા હતા. આ ઉપરાંત ટ્રમ્પના કટ્ટર સમર્થક ચાર્લી કર્કની હત્યા અંગે સોશિયલ મીડિયા પર કમેન્ટ કરનારા છ લોકોના વિઝા પણ રદ કરાયા હોવાનું સ્ટેટ ડિપાર્ટમેન્ટે ગયા મહિને જણાવ્યું હતું.
ટ્રમ્પ સરકાર અમેરિકાની વિદેશ નીતિની વિરૂદ્ધમાં બોલનારા કે પછી જે-તે દેશનો વિરોધ કરનારા લોકોને પણ ડિપોર્ટ કરી રહી છે. ટ્રમ્પે સત્તા સંભાળી ત્યારે પેલેસ્ટાઈનનું સમર્થન અને ઈઝરાયેલનો વિરોધ કરનારા હજારો સ્ટૂડન્ટ્સના વિઝા કેન્સલ કરી દેવામાં આવ્યા હતા. એવું નથી કે માત્ર વિઝા હોલ્ડર્સ સામે જ આ પ્રકારની કાર્યવાહી કરવામાં આવી છે, ટ્રમ્પના આવ્યા બાદ જેમને જેલમાં જવું પડ્યું હતું તેમાં અમુક લોકો ગ્રીન કાર્ડ હોલ્ડર પણ હતા.
છેલ્લા એકાદ વર્ષમાં ઘણા ગુજરાતીઓના પણ યુએસ વિઝા રદ થયા છે જેમાં વેલિડ વિઝા પર યુએસ ગયેલાને એન્ટ્રી આપવાનો ઈનકાર કરવામાં આવ્યો હોય તેમનો પણ સમાવેશ થાય છે. દારૂ પીને ડ્રાઈવ કરવા ઉપરાંત અમેરિકામાં ચાલતા પાર્સલ કાંડ સહિતના ક્રાઈમમાં અનેક ગુજરાતીઓ પકડાયા છે અને તેમાં જે દોષિત ઠર્યા છે તેમાંના અમુકને ડિપોર્ટ કરાયા છે જ્યારે ઘણા હજુય જેલમાં જ છે.
વેલિડ વિઝા કેન્સલ કરવાની સાથે અમેરિકાએ વિઝા ઈશ્યૂ કરવાની પોલિસી પણ ખૂબ જ કડક બનાવી દીધી છે જેના કારણે હવે સ્ટૂડન્ટથી લઈને વિઝિટર વિઝા મેળવવું ખૂબ જ મુશ્કેલ બની ગયું છે. ચાલુ વર્ષે જ ઈન્ડિયન સ્ટૂડન્ટ્સને મળતા વિઝામાં ધરખમ ઘટાડો નોંધાતા અમેરિકા જનારા સ્ટૂડન્ટ્સની સંખ્યામાં પણ મોટો ઘટાડો જોવા મળ્યો હતો. તેવી જ રીતે સારી પ્રોફાઈલ હોય તેવા લોકોને પણ ટુરિસ્ટ વિઝા આપવાનો ઈનકાર કરવામાં આવી રહ્યો છે અને વિઝા મેળવવા માટે જો કોઈએ નકલી ડોક્યુમેન્ટ આપવા ઉપરાંત બીજી કોઈ ગોલમાલ કરી હોય તો તેના પર આજીવન પ્રતિબંધ સુધીના પગલાં પણ લેવામાં આવી રહ્યા છે.
(9:59 AM IST)
છેલ્લા 8 દિવસમાં સૌથી લોકપ્રિય 
