નવી દિલ્‍હી તા.૭: ઇન્‍ડિયન પ્રીમિયર લીગ (IPL) ના ઇતિહાસમાં એક મોટી ક્ષણ ઉમેરવાની છે કારણ કે લીગની સૌથી જૂની અને સૌથી પ્રખ્‍યાત ફ્રેન્‍ચાઇઝીઓમાંની એક, રોયલ ચેલેન્‍જર્સ બેંગ્‍લોર (RCB) વેચાણ માટે જઈ રહી છે. તેના માલિક, ડિયાજિયોએ વર્તમાન IPL ચેમ્‍પિયનને વેચવાની તૈયારી શરૂ કરી દીધી છે અને આગામી વર્ષે ૩૧ માર્ચ સુધીમાં વેચાણ પૂર્ણ કરવાની આશા રાખે છે. કેટલાક અહેવાલો દાવો કરે છે કે RCB ની કિમત લગભગ ડોલર ૨ બિલિયન હોવાનો અંદાજ છે. પરંતુ RCB નો નવો માલિક કોણ હશે? આ સુપરહિટ ફ્રેન્‍ચાઇઝી સાથે કઈ કંપનીને પોતાનું નામ જોડવાની તક મળશે? અહેવાલ છે કે પાંચ મોટી કંપનીઓ રેસમાં છે, જેમાં દેશના સૌથી મોટા ઔદ્યોગિક ગૃહોમાંના એક અદાણી ગ્રુપનો પણ સમાવેશ થાય છે.

ક્રિકબઝના એક અહેવાલમાં ખુલાસો થયો છે કે દેશના બીજા ક્રમના સૌથી ધનિક ઉદ્યોગપતિ ગૌતમ અદાણી આ ફ્રેન્‍ચાઇઝી ખરીદવામાં રસ ધરાવે છે અને તેના માટે બોલી લગાવી શકે છે. ગૌતમ અદાણીએ અગાઉ IPL ફ્રેન્‍ચાઇઝી મેળવવાનો પ્રયાસ કર્યો હતો. જ્‍યારે BCCIએ ૨૦૨૧ સીઝન પછી બે નવી ટીમો લોન્‍ચ કરવાની જાહેરાત કરી હતી, ત્‍યારે અદાણી ગ્રુપે અમદાવાદ ફ્રેન્‍ચાઇઝી માટે બોલી લગાવી હતી પરંતુ તે નિષ્‍ફળ ગયું હતું. જોકે, આશરે રૂા.૧૭ લાખ કરોડના બજાર મૂડીકરણ સાથે, અદાણી ગ્રુપ વિમેન્‍સ પ્રીમિયર લીગ (WPL) માં ગુજરાત જાયન્‍ટ્‍સ ફ્રેન્‍ચાઇઝીનું માલિક છે.

ભારતની અગ્રણી રસી ઉત્‍પાદક કંપની, સીરમ ઇન્‍સ્‍ટિટ્‍યૂટ ઓફ ઇન્‍ડિયા (SII) ના માલિક અદાર પૂનાવાલાએ પણ આ ફ્રેન્‍ચાઇઝી ખરીદવામાં રસ દર્શાવ્‍યો છે અને તે રેસમાં રહે છે. પૂનાવાલાએ પોતે એક સોશિયલ મીડિયા પોસ્‍ટમાં જાહેરાત કરી હતી કે RCB યોગ્‍ય કિમતે સારી ટીમ બની શકે છે. પૂનાવાલા રૂા.૨ લાખ કરોડથી વધુ મૂલ્‍યની કંપની SII ના CEO છે.

જિંદાલ ગ્રુપ પણ આ ફ્રેન્‍ચાઇઝી હસ્‍તગત કરવાની દોડમાં છે. સજ્જન જિદાલની કંપની, JSW, પહેલેથી જ IPL અને WPL માં સામેલ છે, જ્‍યાં તે દિલ્‍હી કેપિટલ્‍સની સહ-માલિકી ધરાવે છે. કંપની GMR ગ્રુપ સાથે મળીને દિલ્‍હી કેપિટલ્‍સની ફ્રેન્‍ચાઇઝી ચલાવે છે. જો કે, હવે એવું લાગે છે કે JSW સંપૂર્ણપણે બેંગલુરુ ફ્રેન્‍ચાઇઝી હસ્‍તગત કરવા માંગે છે, અને આમ કરવાથી, તે દિલ્‍હી કેપિટલ્‍સમાં તેનો હિસ્‍સો વેચી દેશે. JSW ના રસનું એક મુખ્‍ય કારણ બેંગલુરુ સાથેનું તેનું જોડાણ છે. JSW ગ્રુપ, જેનું મૂલ્‍ય આશરે રૂા.૩ લાખ કરોડ છે, તે પહેલાથી જ બેંગલુરુ ફૂટબોલ ક્‍લબ ચલાવે છે, અને RCB દ્વારા, તે શહેરમાં પોતાની ઓળખ સંપૂર્ણપણે સ્‍થાપિત કરી શકે છે.

આ ઉપરાંત, એક અગ્રણી ઉદ્યોગપતિ રવિ જયપુરિયા પણ RCB ખરીદવાનો દાવો કરી શકે છે. તેમની કંપની, દેવયાની ઇન્‍ટરનેશનલ, ભારતમાં KFC, પિઝા હટ અને કોસ્‍ટા કોફી જેવી લોકપ્રિય અમેરિકન ફાસ્‍ટ ફૂડ બ્રાન્‍ડ્‍સની ચેઇન ચલાવે છે. વરુણ બેવરેજીસ દ્વારા, તેઓ પેપ્‍સી માટે બોટલ પણ બનાવે છે. જયપુરિયાએ અગાઉ કોઈપણ સ્‍પોર્ટ્‍સ ફ્રેન્‍ચાઇઝીમાં હિસ્‍સો રાખ્‍યો નથી.

દરમિયાન, યુનાઇટેડ સ્‍ટેટ્‍સની એક ખાનગી રોકાણ કંપની પણ ફ્રેન્‍ચાઇઝ ખરીદવામાં રસ ધરાવે છે. જો કે, આ જૂથનું નામ અથવા ઓળખ હજુ સુધી જાહેર કરવામાં આવી નથી.