કારાકાસ: સપ્ટેમ્બર મહિનાથી, યુએસ ડિફેન્સ સેક્રેટરી પીટ હેગસેથના નિર્દેશન હેઠળ, અમેરિકાએ વેનેઝુએલાના દરિયાકિનારે અને પૂર્વીય પેસિફિક મહાસાગરમાં ડ્રગ્સની હેરાફેરી સાથે સંકળાયેલી બોટ પર ૧૩ હવાઈ હુમલા કર્યા છે, જેમાં ૬૦થી વધુ લોકોનાં મોત થયા છે. જોકે, યુએસ આ હુમલાઓને ડ્રગ વિરોધી મિશન તરીકે ગણાવી રહ્યું છે, પણ આંતરરાષ્ટ્રીય સ્તરે આ કાર્યવાહીએ મોટો વિવાદ જગાવ્યો છે. સંયુક્ત રાષ્ટ્ર (UN)ના માનવાધિકાર વડાએ આ હુમલાઓને 'અસ્વીકાર્ય' ગણાવ્યા છે અને તેમને ગેરકાયદેસર હત્યા તરીકે જોવાની માંગ કરી છે.

દરમિયાન, વેનેઝુએલાના રાષ્ટ્રપતિ નિકોલસ માદુરોએ અમેરિકા પર આક્રમણ અને હત્યાનો સીધો આરોપ લગાવ્યો છે. માદુરોએ કહ્યું છે કે આ કાર્યવાહી માત્ર ડ્રગ વિરોધી મિશન નથી, પરંતુ ટ્રમ્પ વહીવટીતંત્ર દ્વારા શાસન પરિવર્તન અને વેનેઝુએલામાં અસ્થિરતા ફેલાવવાનો રાજકીય પ્રયાસ છે. કોલંબિયાના રાષ્ટ્રપતિ ગુસ્તાવો પેટ્રો સહિત મેક્સિકો અને ત્રિનિદાદ અને ટોબેગો જેવા પડોશી દેશોએ પણ ચિંતા વ્યક્ત કરી છે. રાષ્ટ્રપતિ પેટ્રોએ સ્પષ્ટતા કરી છે કે મૃતકોમાં કેટલાક કોલમ્બિયન નાગરિકો હતા જેઓ કોઈ બળવાખોર સંગઠન સાથે સંકળાયેલા નહોતા, જેનાથી યુએસના દાવાઓ ભ્રામક સાબિત થાય છે. આંતરરાષ્ટ્રીય કાયદાના નિષ્ણાતો ચેતવણી આપી રહ્યા છે કે જો યુએસ આ હુમલાઓ માટે નક્કર પુરાવા રજૂ કરવામાં નિષ્ફળ જશે, તો આ કાર્યવાહી યુએન ચાર્ટરનું ઉલ્લંઘન અને 'રાજ્ય પ્રાયોજિત હત્યા' બની શકે છે.