નવી દિલ્હી: અમદાવાદમાં થયેલી ભયાનક એર ઇન્ડિયા વિમાન દુર્ઘટનામાં માર્યા ગયેલા પાઇલટ-ઇન-કમાન્ડ કેપ્ટન સુમિત સભરવાલના ૯૧ વર્ષીય પિતા પુષ્કરાજ સભરવાલે સુપ્રીમ કોર્ટમાં સ્વતંત્ર તપાસની માંગ કરતી અરજી દાખલ કરતા આ મામલો ફરી એકવાર ચર્ચામાં આવ્યો છે. આજે સુપ્રીમ કોર્ટે આ અરજીના સંદર્ભમાં કેન્દ્ર સરકાર અને નાગરિક ઉડ્ડયન મહાનિર્દેશાલય (DGCA) ને નોટિસ પાઠવીને જવાબ માંગ્યો છે.

આ દરમિયાન, જસ્ટિસ સૂર્યકાંત અને જોયમલ્યા બાગચીની બેન્ચે મૃતક પાઇલટના વૃદ્ધ પિતાને ભાવુક થઈને કહ્યું, "તમારે તમારા પર દોષ ન લેવો જોઈએ. આ અકસ્માત માટે પાઇલટને જવાબદાર ઠેરવવામાં આવ્યો નથી. તે એક અકસ્માત હતો." કોર્ટે સ્પષ્ટ કર્યું કે એરક્રાફ્ટ એક્સિડેન્ટ ઇન્વેસ્ટિગેશન બ્યુરો (AAIB) ના પ્રારંભિક અહેવાલમાં પણ પાઇલટ સામે કોઈ પુરાવા નથી. પાઇલટના પિતાની અરજીમાં ટેકનિકલ અને ઉડ્ડયન નિષ્ણાતોની બનેલી સ્વતંત્ર સમિતિ દ્વારા તપાસની માંગ કરવામાં આવી છે, કારણ કે તેમના મતે પક્ષપાતી તપાસથી ભવિષ્યના મુસાફરોનું જીવન જોખમમાં મૂકાઈ શકે છે. ઉલ્લેખનીય છે કે, ૧૨ જૂનના રોજ અમદાવાદથી લંડન જતી ફ્લાઇટ AI-૧૭૧ના ક્રેશમાં કુલ ૨૬૧ લોકોનાં મોત થયા હતા.