નવી દિલ્હી: દેશની પ્રતિષ્ઠિત જવાહરલાલ નહેરુ યુનિવર્સિટી (JNU) વિદ્યાર્થી સંઘ (JNUSU) ની ચૂંટણીના પરિણામો જાહેર થઈ ગયા છે, જેમાં લેફ્ટ યુનિટી (Left Unity) પેનલે તમામ ચાર કેન્દ્રીય પદો પર ભવ્ય જીત હાંસલ કરી છે. ઓલ ઈન્ડિયા સ્ટુડન્ટ્સ એસોસિએશન (AISA) ના ઉમેદવાર અદિતિ મિશ્રા JNUSUના નવા પ્રમુખ તરીકે ચૂંટાયા છે.

અદિતિ મિશ્રાનો ભૂતકાળ વિદ્યાર્થી આંદોલનોમાં સક્રિય રહ્યો છે. તેમણે ૨૦૧૭માં BHU (બનારસ હિંદુ યુનિવર્સિટી) માં થયેલા વિરોધ પ્રદર્શનોમાં સક્રિયપણે ભાગ લીધો હતો, જ્યાં વિદ્યાર્થીઓ રાત્રિ કર્ફ્યુ અને લિંગ આધારિત ભેદભાવ સામે 'અમને સુરક્ષા નહીં, સમાનતા જોઈએ છે' ના નારા સાથે લડ્યા હતા. આ ઉપરાંત, તેમણે પુડુચેરી યુનિવર્સિટીમાં હિન્દુત્વ વિચારધારા (ભગવાકરણ) સામેના વિરોધ પ્રદર્શનોમાં પણ અવાજ ઉઠાવ્યો હતો. હાલમાં, અદિતિ ઉત્તર પ્રદેશમાં લિંગ હિંસા અને મહિલાઓ દ્વારા તેના પ્રતિકાર પર ડોક્ટરેટ સંશોધન કરી રહી છે.

અન્ય પદો પર SFI ના ગોપિકા બાબુએ ઉપપ્રમુખ, DSF ના સુનિલ યાદવે મહાસચિવ અને AISA ના દાનિશ અલીએ સંયુક્ત સચિવ તરીકે જીત મેળવી છે. પ્રમુખપદના ભાષણમાં અદિતિ મિશ્રાએ દલિતો પરના અત્યાચારનો મુદ્દો ઉઠાવ્યો અને સ્પષ્ટ કર્યું કે, "આ બાબા સાહેબનું શાસન છે, બાબાનું નહીં." આ જીત સાથે JNUમાં ફરી એકવાર ડાબેરી વિચારધારાનું પ્રભુત્વ સાબિત થયું છે.