ઇન્દોર, મધ્ય પ્રદેશ : મધ્યપ્રદેશમાં રાજકીય ગઢ ગણાતા ઇન્દોરમાં કોંગ્રેસ પાર્ટીમાં આંતરિક ઝઘડો ચરમસીમાએ પહોંચી ગયો છે. શહેર કોંગ્રેસના નેતાઓ વચ્ચેની કથિત ઑડિયો રેકોર્ડિંગ વાયરલ થયા બાદ આ સમગ્ર મામલો હવે દિલ્હી સ્થિત પાર્ટી હાઈકમાન્ડ સુધી પહોંચી ગયો છે.

આ કથિત ઓડિયો રેકોર્ડિંગ શહેર કોંગ્રેસ પ્રમુખ ચિન્ટુ ચોક્સી અને ભૂતપૂર્વ પ્રમુખ સુરજીત સિંહ ચઢ્ઢા વચ્ચેની ફોન વાતચીત હોવાનું કહેવાય છે. તેમાં ચોક્સી પર વરિષ્ઠ કોંગ્રેસ નેતા અને ભૂતપૂર્વ મુખ્યમંત્રી દિગ્વિજય સિંહ વિરુદ્ધ અપમાનજનક ટિપ્પણી કરવાનો આરોપ છે.

આ મામલાને ગંભીરતાથી લેતા શહેર કોંગ્રેસના કાર્યકારી પ્રમુખ દેવેન્દ્ર સિંહ યાદવે પાર્ટીના રાષ્ટ્રીય અધ્યક્ષ મલ્લિકાર્જુન ખડગેને પત્ર લખીને તાત્કાલિક કાર્યવાહીની માંગ કરી છે. યાદવે કહ્યું કે, "જો ઓડિયો સાચો હોય, તો વર્તમાન પ્રમુખ ચિન્ટુ ચોક્સી સામે પગલાં લેવા જોઈએ, અને જો ઓડિયો નકલી હોય, તો પાર્ટીએ પોલીસ ફરિયાદ નોંધાવવી જોઈએ."

બીજી તરફ, ચિન્ટુ ચોક્સીએ આ ઓડિયોને સંપૂર્ણપણે નકલી ગણાવ્યો છે અને દિગ્વિજય સિંહ વિરુદ્ધ કોઈ પણ અપમાનજનક શબ્દોના ઉપયોગનો ઇનકાર કર્યો છે. હવે પાર્ટી હાઈકમાન્ડ આ આંતરિક ઝઘડા પર શું નિર્ણય લે છે, તેના પર ઇન્દોરના રાજકારણની નજર ટકેલી છે.