નવીદિલ્હી: વિદેશ મંત્રાલયના પ્રવક્તા રણધીર જયસ્વાલે અમેરિકી રાષ્ટ્રપતિ ટ્રમ્પની ટિપ્પણી પર પ્રતિક્રિયા આપતા જણાવ્યું કે, પાકિસ્તાનનો ઇતિહાસ પરમાણુ તસ્કરી અને ગુપ્ત પ્રવૃત્તિઓથી ભરેલો છે. ભારતે કહ્યું કે એ.ક્યુ. ખાન નેટવર્ક અને નિકાસ નિયંત્રણોનું ઉલ્લંઘન પાકિસ્તાનની જૂની પદ્ધતિ રહી છે.

શુક્રવારે યોજાયેલી સાપ્તાહિક મીડિયા બ્રિફિંગમાં, વિદેશ મંત્રાલયના પ્રવક્તા રણધીર જયસ્વાલે પાકિસ્તાનની પરમાણુ ગતિવિધિઓ પર ગંભીર ચિંતા વ્યક્ત કરી હતી. 

અમેરિકી રાષ્ટ્રપતિ ડોનાલ્ડ ટ્રમ્પના તાજેતરના નિવેદન પર પૂછાયેલા પ્રશ્નના જવાબમાં, જયસ્વાલે સ્પષ્ટપણે જણાવ્યું હતું કે "ગુપ્ત અને ગેરકાયદેસર પરમાણુ પ્રવૃત્તિઓ પાકિસ્તાનના ઇતિહાસ સાથે સુસંગત છે."

તેમણે વધુમાં ઉમેર્યું કે પાકિસ્તાનનો ઇતિહાસ દાયકાઓની તસ્કરી, નિકાસ નિયંત્રણોના ઉલ્લંઘન, ગુપ્ત ભાગીદારી અને કુખ્યાત એ.ક્યુ. ખાન નેટવર્ક દ્વારા પરમાણુ પ્રસાર પર કેન્દ્રિત રહ્યો છે. ભારતે હંમેશા આંતરરાષ્ટ્રીય સમુદાયનું ધ્યાન પાકિસ્તાનના આ રેકોર્ડ તરફ દોર્યું છે.

ઉલ્લેખનીય છે કે, અમેરિકી રાષ્ટ્રપતિ ટ્રમ્પે તાજેતરમાં દાવો કર્યો હતો કે રશિયા અને ચીન સહિત પાકિસ્તાન પણ સક્રિયપણે પરમાણુ પરીક્ષણ કરી રહ્યું છે. ભારતે આ ટિપ્પણીની ગંભીર નોંધ લીધી છે અને પાકિસ્તાનની ગતિવિધિઓ પર ફરી એકવાર વૈશ્વિક ધ્યાન કેન્દ્રિત કર્યું છે.