ઉત્તર જકાર્તાની એક શાળા પરિસરમાં આવેલી મસ્જિદમાં શુક્રવારની નમાજ દરમિયાન થયેલા વિસ્ફોટમાં ૫૫ લોકો ઘાયલ થયા છે. પોલીસે આ ઘટનામાં તે જ શાળાના ૧૭ વર્ષીય વિદ્યાર્થીને શંકાસ્પદ ગણાવ્યો છે. વિસ્ફોટ કોઈ બોમ્બથી નહીં પરંતુ એક રમકડા જેવા ઉપકરણથી થયો હોવાનું પ્રાથમિક તારણ છે.

ઇન્ડોનેશિયાની રાજધાની જકાર્તાના ઉત્તરીય વિસ્તાર કેલાપા ગાડિંગમાં શુક્રવારે એક હાઇસ્કૂલ પરિસરમાં આવેલી મસ્જિદમાં જોરદાર વિસ્ફોટ થતાં અફરાતફરી મચી ગઈ હતી. આ ઘટના શુક્રવારની નમાજ દરમિયાન બની હતી, જેના કારણે વિદ્યાર્થીઓ સહિત ઓછામાં ઓછા ૫૫ લોકો ઘાયલ થયા હતા.

પોલીસ તપાસમાં આ ઘટના આતંકવાદી કૃત્ય ન હોવાનું સામે આવ્યું છે. 

જકાર્તા પોલીસે જણાવ્યું કે, આ વિસ્ફોટ માટે તે જ શાળામાં ભણતો ૧૭ વર્ષીય વિદ્યાર્થી શંકાસ્પદ છે. વિસ્ફોટ મસ્જિદના લાઉડસ્પીકર નજીક થયો હતો અને તેનું કારણ એક સંશોધિત રમકડું અથવા કોઈ અન્ય ઉપકરણ હોવાનું માનવામાં આવે છે, જે તે વિદ્યાર્થી દ્વારા લાવવામાં આવ્યું હતું. મોટાભાગના લોકોને દાઝી જવાથી અને કાચના ટુકડા વાગવાથી ઈજાઓ થઈ છે. પોલીસ આ મામલે વિદ્યાર્થીની પૂછપરછ કરીને વિસ્ફોટના ચોક્કસ કારણની તપાસ કરી રહી છે.