ઇસ્તંબુલ : ઉત્તર-પશ્ચિમ તુર્કીમાં એક મોટી અને ભયાનક દુર્ઘટનાના સમાચાર આવ્યા છે. કોકેલી પ્રાંતના દિલોવાસી વિસ્તારમાં આવેલા એક પરફ્યુમ વેરહાઉસમાં લાગેલી ભીષણ આગમાં છ લોકોના કરુણ મોત નિપજ્યા છે. આ આગ આજે સવારે મીમાર સિનાન વિસ્તારમાં ફાટી નીકળી હતી.

ગવર્નર ઇલ્હામી અક્તાસે જણાવ્યું હતું કે આ દુર્ઘટનામાં પાંચ લોકોને હોસ્પિટલમાં દાખલ કરવામાં આવ્યા છે, જેમાંથી એક વ્યક્તિની હાલત ગંભીર છે અને તે બર્ન યુનિટમાં સારવાર હેઠળ છે.

ઇસ્તંબુલથી લગભગ 70 કિલોમીટર પૂર્વમાં સ્થિત દિલોવાસી અનેક ફેક્ટરીઓ અને સ્ટોરેજ સુવિધાઓનું હબ છે. કટોકટી સેવાઓએ આગને કાબૂમાં લેતા પહેલા કલાકો સુધી જહેમત ઉઠાવી હતી.

આગ લાગવાનું કારણ હજુ સુધી જાણી શકાયું નથી. ન્યાય પ્રધાન યિલમાઝ ટુંકે આ ઘટનાની ન્યાયિક તપાસની જાહેરાત કરી છે, જ્યારે શ્રમ મંત્રાલયે પણ આ દુર્ઘટનાની તપાસ શરૂ કરી દીધી છે.