કાબુલઃ કાબુલ અને ઇસ્લામાબાદ વચ્ચેનો તણાવ હવે ગંભીર રૂપ લઈ રહ્યો છે. તુર્કિયે અને કતારની મધ્યસ્થીથી ઇસ્તંબુલમાં ચાલી રહેલી શાંતિ મંત્રણા નિષ્ફળ ગઈ છે, જેના માટે અફઘાનિસ્તાને પાકિસ્તાનની "અયોગ્ય અને ગેરવાજબી માંગણીઓ" ને જવાબદાર ઠેરવી છે. આ નિષ્ફળતા બાદ, તાલિબાન સરકારે સ્પષ્ટ અને કડક વલણ અપનાવ્યું છે. તાલિબાન પ્રવક્તા ઝબીઉલ્લાહ મુજાહિદે જણાવ્યું કે, "યુદ્ધમાં ઉતરવું એ અમારી પ્રથમ પસંદગી નથી, પરંતુ જો પરિસ્થિતિ યુદ્ધ તરફ જશે, તો અમને પોતાની રક્ષા કરવાનો પૂરો અધિકાર છે."
પાકિસ્તાન તરફથી પણ આ બાબતે સ્પષ્ટ સંકેત મળ્યા છે. પાકિસ્તાનના રક્ષા મંત્રી ખ્વાજા આસિફે ચેતવણી આપી છે કે જ્યાં સુધી અફઘાનિસ્તાન તરફથી સરહદ પર કોઈ ઉલ્લંઘન નહીં થાય, ત્યાં સુધી જ યુદ્ધવિરામ ટકી રહેશે. પાકિસ્તાનના સૂચના મંત્રીએ પણ શાંતિની ઈચ્છા વ્યક્ત કરતાં સ્પષ્ટ કર્યું છે કે પોતાના લોકોની સુરક્ષા માટે તેઓ જરૂરી પગલાં લેવા તૈયાર છે. આ દર્શાવે છે કે બંને દેશો વચ્ચે રાજદ્વારી સમાધાન હાલ પૂરતું દૂર દેખાઈ રહ્યું છે.
આ તણાવની શરૂઆત ઓક્ટોબર મહિનામાં થઈ હતી, જ્યારે કાબુલમાં થયેલા બેવડા વિસ્ફોટો માટે તાલિબાન પ્રશાસને પાકિસ્તાનને જવાબદાર ઠેરવ્યું હતું. તેના વળતા જવાબમાં, તાલિબાને પાકિસ્તાની સૈન્ય ચોકીઓ પર "પ્રતિશોધાત્મક" હુમલો કરવાનો દાવો કર્યો હતો, જેમાં 58 પાકિસ્તાની સૈનિકો માર્યા ગયા હોવાનું કહેવાયું હતું, જોકે પાકિસ્તાને માત્ર 23 સૈનિકોના મોતની પુષ્ટિ કરી હતી.
સરહદી અથડામણ પછી, 48 કલાકનો યુદ્ધવિરામ અમલમાં આવ્યો હતો, પરંતુ પાકિસ્તાની દળો દ્વારા અફઘાન વિસ્તારમાં કરાયેલા હવાઈ હુમલાઓથી તણાવ ફરી ભડક્યો હતો. આ હુમલામાં ઓછામાં ઓછા 10 લોકોના મોત થયા હતા, જેમાં ત્રણ સ્થાનિક ક્રિકેટરો પણ સામેલ હતા. આ સંઘર્ષને શાંત પાડવા માટે કતાર અને તુર્કિયેની દખલગીરી બાદ મંત્રણા શરૂ થઈ હતી, જે હવે ફરી એકવાર નિષ્ફળતા તરફ વળી છે અને સરહદ પર ફરી તણાવ વધવાની શક્યતા છે.