નવી દિલ્હીની સંરક્ષણ તૈયારીઓમાં એક મોટું પગલું લેવાઈ રહ્યું છે. ભારત સરકાર ઇઝરાયલ સાથે આશરે ૩.૭૬૨ બિલિયન ડોલર (અંદાજે રૂ.૩૨,૭૯૬ કરોડ) ના મોટા સંરક્ષણ સોદાને અંતિમ સ્વરૂપ આપવાની તૈયારી કરી રહી છે. આ સોદામાં મુખ્યત્વે મધ્યમ-અંતરની સપાટીથી હવામાં પ્રહાર કરતી મિસાઇલ સિસ્ટમ્સ (MR-SAMs) ની વધારાની ખરીદીનો સમાવેશ થાય છે. આ સોદો મંજૂર થયા બાદ, દુશ્મનોના હુમલાઓને હવામાં જ નિષ્ક્રિય કરી દેવામાં આવશે, જેનાથી ફાઇટર જેટ કે પરમાણુ બોમ્બની જરૂરિયાત રહેશે નહીં.
આ મહત્ત્વપૂર્ણ દરખાસ્તને સંરક્ષણ પ્રધાન રાજનાથ સિંહની અધ્યક્ષતામાં સંરક્ષણ મંત્રાલયની ઉચ્ચ-સ્તરીય ખરીદી સમિતિની બેઠકમાં ૨૩ નવેમ્બરના રોજ અંતિમ મંજૂરી મળવાની અપેક્ષા છે. આ સોદા દ્વારા ભારત તેની વાયુ સંરક્ષણ ક્ષમતાઓને વધુ મજબૂત કરવા માગે છે. પ્રસ્તાવિત ખરીદીમાં ભારતીય સેના માટે રોકેટના વધારાના ઓર્ડરની સાથે સાથે વાયુસેના અને નૌકાદળ માટે MR-SAM સિસ્ટમના નવા યુનિટ્સનો સમાવેશ થાય છે. ત્રણેય સશસ્ત્ર દળો માટે લગભગ ૩૦૦થી વધુ મિસાઇલ યુનિટ્સ ખરીદવાની યોજના છે.
MR-SAM મિસાઇલ સિસ્ટમ એ ભારત અને ઇઝરાયલ વચ્ચેનો એક સંયુક્ત પ્રોજેક્ટ છે, જે ઇઝરાયલ એરોસ્પેસ ઇન્ડસ્ટ્રીઝ (IAI) અને ભારત ડાયનેમિક્સ લિમિટેડ (BDL) દ્વારા સંયુક્ત રીતે વિકસાવવામાં આવી છે. આ અદ્યતન મિસાઇલ સિસ્ટમ એકસાથે અનેક લક્ષ્યોને નિશાન બનાવવામાં સક્ષમ છે. તે અદ્યતન રેડિયો-ફ્રિકવન્સી સીકર અને ફેઝ્ડ-એરે રડારથી સજ્જ છે, જે તેને ક્રુઝ મિસાઇલ, ડ્રોન, ફાઇટર જેટ અને હેલિકોપ્ટર જેવા હવાઈ ખતરાઓને અટકાવવામાં સક્ષમ બનાવે છે.
આ સંરક્ષણ સોદો ભારતની લાંબા ગાળાની હવાઈ સંરક્ષણ વ્યૂહરચના માટે નિર્ણાયક છે. આકાશ મિસાઇલ સિસ્ટમ અને રશિયાની S-400 સિસ્ટમ્સની સાથે MR-SAMsનું જોડાણ ભારતને ત્રણેય મોરચે અજેય બહુ-સ્તરીય હવા સંરક્ષણ આર્કિટેક્ચર પ્રદાન કરશે. આ સોદો ભારત-ઇઝરાયલના મજબૂત દ્વિપક્ષીય સંબંધોને વધુ ઊંડો બનાવશે.