નવી દિલ્હી/પુણે: મહારાષ્ટ્રના ડેપ્યુટી ચીફ મિનિસ્ટર અજિત પવારના દીકરા પાર્થ પવારની કંપનીને એક મોટા વિવાદ પછી આર્થિક મોટો ફટકો પડ્યો છે. પુણેની વિવાદાસ્પદ જમીનનો રૂ.૩૦૦ કરોડનો સોદો રદ કરી દેવામાં આવ્યો છે. જોકે, આ સોદો રદ થવાથી વિવાદનો અંત આવ્યો નથી, કારણ કે પાર્થ પવારની કંપનીએ હવે આ સેલ-ડીડ રદ કરવા બદલ ડબલ સ્ટૅમ્પ-ડ્યુટી ચૂકવવી પડશે, જેની રકમ આશરે રૂ.૪૨ કરોડ જેટલી થાય છે.
રૂ.આ સમગ્ર મામલો ત્યારે સામે આવ્યો જ્યારે વિપક્ષી નેતાઓએ આરોપ લગાવ્યો કે પુણેના મુંઢવા વિસ્તારમાં આવેલી ૪૦ એકર સરકારી જમીન પાર્થ પવારની કંપનીને રૂ.૧૮૦૦ કરોડની મૂળ કિંમતની જગ્યાએ માત્ર રૂ.૩૦૦ કરોડમાં વેચી દેવામાં આવી હતી, તે પણ જરૂરી મંજૂરીઓ વિના. રજિસ્ટ્રેશન ઍન્ડ સ્ટૅમ્પ્સ ડિપાર્ટમેન્ટે હવે કંપનીના ભાગીદાર દિગ્વિજય પાટીલને જાણ કરી છે કે સેલ-ડીડ કરતી વખતે ડેટા સેન્ટરનો પ્રસ્તાવ બતાવીને જે ૭ ટકા સ્ટૅમ્પ-ડ્યુટી માફ કરાવાઈ હતી, તે પ્લાન રદ થવાથી હવે તે રકમ (રૂ.૨૧ કરોડ) અને કૅન્સલેશનની રકમ એમ મળીને કુલ રૂ.૪૨ કરોડ ભરવા પડશે.
વિવાદ વકરતાં અજિત પવારે બચાવમાં સ્પષ્ટતા કરી હતી કે પાર્થને આ જમીન સરકારી હોવાની જાણ નહોતી. જોકે, તેમના પ્રથમ નિવેદન કે 'સંતાનો મોટાં થઈ જાય છે ત્યારે તેઓ તેમનો પોતાનો બિઝનેસ જાતે કરે છે' તેના પર BJP સાંસદ નારાયણ રાણેએ કટાક્ષ કર્યો હતો કે 'સંતાનો આજ્ઞાકારી હોવાં જોઈએ.'
આ કૌભાંડને લઈને પરિવારની અંદર પણ જુદા-જુદા મંતવ્યો સામે આવ્યા છે. શરદ પવારે પત્રકારો સાથે વાત કરતાં કહ્યું કે 'કુટુંબ અને રાજકારણ બે અલગ-અલગ બાબતો છે, અમે પરિવાર તરીકે એક છીએ, પણ અમારી વિચારધારા અલગ છે.' તેમણે સ્પષ્ટ કહ્યું કે આ કેસમાં તપાસ કરીને સત્ય સમાજ સામે મૂકવું જોઈએ, જે દર્શાવે છે કે આ આર્થિક અને રાજકીય વિવાદ પવાર પરિવાર માટે એક મોટો પડકાર બની ગયો છે.