પંજાબના સનૌર બેઠકના આમ આદમી પાર્ટીના ધારાસભ્ય હરમિત સિંહ પઠાણમાજરા બળાત્કારના ગંભીર આરોપમાં સપ્ટેમ્બર મહિનાથી ફરાર છે. પંજાબ પોલીસ તેમને શોધી રહી હતી, ત્યારે જ તેઓ ઓસ્ટ્રેલિયાથી એક વિદેશી પંજાબી વેબ ચેનલને વીડિયો ઇન્ટરવ્યુ આપતા દેખાયા છે, જેનાથી પંજાબ પોલીસની કામગીરી પર સવાલો ઉભા થયા છે.

 

પંજાબના સનૌર વિધાનસભા બેઠક પરથી આમ આદમી પાર્ટીના ધારાસભ્ય હરમિત સિંહ પઠાણમાજરાની મુશ્કેલીઓ વધી રહી છે. તેમના પર ઝિરકપુરની એક મહિલાએ બળાત્કાર, છેતરપિંડી અને ધાકધમકી આપવાનો આરોપ લગાવ્યો છે. મહિલાનો આરોપ છે કે ધારાસભ્યએ પોતે છૂટાછેડા લીધેલા હોવાનું કહીને તેની સાથે સંબંધ બાંધ્યો હતો અને ૨૦૨૧માં લગ્ન પણ કર્યા હતા, જ્યારે હકીકતમાં તેમના પહેલા લગ્ન કાયદેસર હતા.

 

આ કેસમાં પંજાબ પોલીસ ૨ સપ્ટેમ્બરથી તેમની શોધખોળ કરી રહી છે. અગાઉ પોલીસ જ્યારે હરિયાણાના કરનાલમાં એક સંબંધીના ઘરે તેમની ધરપકડ કરવા પહોંચી, ત્યારે તેમના સમર્થકો દ્વારા કથિત પથ્થરમારો અને ગોળીબાર થતાં તેઓ ત્યાંથી નાસી છૂટવામાં સફળ રહ્યા હતા.

 

હવે અચાનક તેમણે ઓસ્ટ્રેલિયાથી એક વીડિયો ઇન્ટરવ્યુ આપીને સૌને ચોંકાવી દીધા છે. આ ઇન્ટરવ્યુમાં તેમણે પોતાની સામેના તમામ આરોપોને નકારી કાઢ્યા છે અને તેને 'રાજકીય ષડયંત્ર' ગણાવ્યું છે. તેમણે દાવો કર્યો કે તેઓ પંજાબના હિતો માટે બોલી રહ્યા હતા, જેના કારણે પક્ષના દિલ્હી નેતૃત્વએ તેમને ચૂપ કરાવવા માટે આ કેસમાં ફસાવ્યા છે. તેમણે સ્પષ્ટ કહ્યું કે તેઓ 'જામીન મળ્યા પછી જ' ભારત પરત ફરશે.

 

દરમિયાન, પટિયાલા પોલીસે ધારાસભ્ય વિરુદ્ધ લુકઆઉટ નોટિસ જારી કરી છે અને સ્થાનિક કોર્ટે તેમની આગોતરા જામીન અરજી ફગાવી દીધી છે. કોર્ટે તેમને ૧૨ નવેમ્બરે હાજર થવા માટે આદેશ આપ્યો છે. જો તેઓ હાજર નહીં થાય, તો તેમને 'ભાગેડુ અપરાધી' જાહેર કરવાની અને તેમની સંપત્તિ જપ્ત કરવાની કાનૂની પ્રક્રિયા શરૂ કરવામાં આવશે.

 

 

____

 

 

 

*બિહારના નાયબ મુખ્યમંત્રી અને ભાજપ નેતા સમ્રાટ ચૌધરી સામે સુપ્રીમમાં અરજી, હત્યા કેસમાં કાનૂની કાર્યવાહીથી બચવા માટે સગીર હોવાના ખોટા સોગંદનામા કરવા બદલ એફઆઇઆરની માંગ*

 

*અરજીમાં દાવો કરવામાં આવ્યો છે કે ચૌધરીએ ભૂતકાળમાં પોતાની ઉંમર અંગે ખોટી માહિતી આપીને કોર્ટને ગેરમાર્ગે દોરેલ: સુપ્રીમ કોર્ટ આ અરજી સ્વીકારશે તો બિહારના રાજકારણમાં મોટો ભૂકંપ આવશે*

 

બિહારના નાયબ મુખ્યમંત્રી અને ભાજપના નેતા સમ્રાટ ચૌધરી વિરુદ્ધ સુપ્રીમ કોર્ટમાં એક અરજી દાખલ કરવામાં આવી છે. અરજીમાં તેમના પર ભૂતકાળમાં કાનૂની કાર્યવાહીથી બચવા માટે ખોટું સોગંદનામું રજૂ કરવાનો આરોપ લગાવી, તેમની વિરુદ્ધ એફઆઇઆર દાખલ કરવાનો આદેશ આપવાની માંગ કરવામાં આવી છે.

 

બિહારના નાયબ મુખ્યમંત્રી સમ્રાટ ચૌધરીની મુશ્કેલીઓ વધતી જણાઈ રહી છે. સુપ્રીમ કોર્ટમાં દાખલ થયેલી એક અરજીમાં દાવો કરવામાં આવ્યો છે કે ચૌધરીએ ભૂતકાળમાં પોતાની ઉંમર અંગે ખોટી માહિતી આપીને કોર્ટને ગેરમાર્ગે દોર્યા હતા.

 

આ સમગ્ર વિવાદ એક દાયકાઓ જૂના હત્યા કેસ સાથે જોડાયેલો છે. તાજેતરમાં રાજકીય રણનીતિકાર પ્રશાંત કિશોરે પણ આ મુદ્દો ઉઠાવ્યો હતો. આરોપ છે કે ૧૯૯૫ના એક હત્યા કેસમાં ટ્રાયલથી બચવા માટે સમ્રાટ ચૌધરીએ તે સમયે કોર્ટ સમક્ષ દાવો કર્યો હતો કે તેઓ સગીર છે અને તેમની ઉંમર માત્ર ૧૪ વર્ષની છે.

 

જોકે, અરજીમાં દલીલ કરવામાં આવી છે કે ચૌધરી દ્વારા ૨૦૨૦ની વિધાનસભા ચૂંટણી સમયે દાખલ કરાયેલા સોગંદનામામાં તેમની ઉંમર ૫૧ વર્ષ દર્શાવવામાં આવી હતી. જો ૨૦૨૦માં તેમની ઉંમર ૫૧ વર્ષ હોય, તો ૧૯૯૫માં ઘટના સમયે તેમની ઉંમર ૨૬ વર્ષની આસપાસ હોવી જોઈએ, નહીં કે ૧૪.

આ ગંભીર વિસંગતતાના આધારે જ સુપ્રીમ કોર્ટમાં અરજી દાખલ કરીને માંગ કરવામાં આવી છે કે કોર્ટને કથિત રીતે ગેરમાર્ગે દોરવા બદલ અને ખોટું સોગંદનામું આપવા બદલ સમ્રાટ ચૌધરી વિરુદ્ધ તાત્કાલિક એફઆઇઆર નોંધવાનો આદેશ આપવામાં આવે. જો સુપ્રીમ કોર્ટ આ અરજી સ્વીકારે છે, તો બિહારના રાજકારણમાં મોટો ભૂકંપ આવી શકે છે.