ભારતની નેશનલ લેવલની હોકી ખેલાડી જુલી યાદવનું લખનૌમાં એક માર્ગ અકસ્માતમાં મૃત્યુ થયું છે. તે ઈન્ટર-સ્કૂલ બેડમિન્ટન ચેમ્પિયનશિપનું નિરીક્ષણ કરવાની તૈયારી કરી રહી હતી. તે એલડીએ કોલોનીમાં એલપીએસ સ્કૂલમાં રમતગમત શિક્ષિકા તરીકે કામ કરતી હતી. આ ઘટના પરા પોલીસ સ્ટેશનના અધિકારક્ષેત્રમાં આવેલા મૌડા મોડ નજીક બની હતી. 23 વર્ષની જુલી શાળાએ વહેલા પહોંચી પણ પછી તેને ખ્યાલ આવ્યો કે તે તેનો ફોન ઘરે ભૂલી ગઈ છે. તે તેની હોન્ડા શાઈન મોટરસાઈકલ લઈને ઘરે પાછી ફરી હતી જેથી તે ફોન પાછો મેળવી શકે. ઘરે પરત ફરી રહી હતી ત્યારે ગેસ સિલિન્ડર ભરેલી ટ્રકે જુલીની બાઈકને ટક્કર મારી. ટ્રકનું વ્હીલ તેના શરીર પર ફરી વળ્યું. પ્રત્યક્ષદર્શીઓએ તાત્કાલિક એમ્બ્યુલન્સ બોલાવી અને તેને નજીકના ટ્રોમા સેન્ટરમાં લઈ ગયા. ત્યાંના ડોક્ટરોએ તેને મૃત જાહેર કરી. ટ્રક ચાલક ઘટનાસ્થળેથી ભાગી ગયો હોવાના સમાચાર છે.