ભારત પર ૫૦ ટકા ટેરિફ જ્યારે પાકિસ્તાન પર ફક્ત ૧૯ ટકા
આરબીઆઈના ભૂતપૂર્વ ગવર્નર રઘુરામ રાજને ટ્રમ્પ-મોદી મિત્રતા પર સવાલ ઉઠાવ્યા : નાની અને મધ્યમ કદની કંપનીઓ સામાન્ય રીતે સૌથી વધુ પ્રભાવિત થાય છેઃ આ સમસ્યા જેટલી લાંબી ચાલશે, તેટલી જ તે મુશ્કેલ બનશે
નવી દિલ્હી, તા., ૧૦: ભૂતપૂર્વ આરબીઆઈ ગવર્નર રઘુરામ રાજને અમેરિકન રાષ્ટ્રપતિ ડોનાલ્ડ ટ્રમ્પ અને વડા પ્રધાન નરેન્દ્ર મોદી વચ્ચેની મિત્રતા પર સવાલ ઉઠાવ્યા છે. તેમનું કહેવું છે કે અમેરિકાએ ભારત પર ૫૦ ટકા ટેરિફ લાદ્યો છે, જ્યારે પાકિસ્તાન પર ફક્ત ૧૯ ટકા ટેરિફ લાદવામાં આવ્યો છે. તો, ટ્રમ્પ અને મોદી વચ્ચેની મિત્રતાનો અર્થ શું છે? રાજને સ્પષ્ટપણે કહ્યું કે અમેરિકા અવિશ્વસનીય છે અને આ સમગ્ર ટેરિફ મુદ્દો ભારત માટે ખૂબ જ નિરાશાજનક રહ્યો છે. અમેરિકાએ ભારત પર ૨પ ટકા ટેરિફ અને રશિયા પાસેથી તેલ ખરીદી પર વધારાનો ૨પ ટકા ટેરિફ લાદ્યો છે.
બિઝનેસ ટુડેના અહેવાલ મુજબ, શિકાગો કાઉન્સિલ ઓન ગ્લોબલ અફેર્સ દ્વારા આયોજિત વાતચીતમાં રાજને કહ્યું, મને લાગે છે કે ભારત છેલ્લા ૨૦ વર્ષોમાં અમેરિકાની નજીક આવી રહ્યું છે, અને હવે તે ખૂબ જ નિરાશ છે. હું નેતાઓ વિશે વાત કરી રહ્યો નથી, પરંતુ તે લોકો વિશે વાત કરી રહ્યો છું જેમને આ ટેરિફનો ભોગ બનવું પડ્યું છે. હું ઘા પર મીઠું ભભરાવવા માંગતો નથી. પરંતુ એક તરફ, પાકિસ્તાન પર ૧૯ ટકા ટેરિફ છે, અને બીજી તરફ, ભારત પર ૫૦ ટકા ટેરિફ છે. મોદી અને ટ્રમ્પ વચ્ચેની ખૂબ જ લોકપ્રિય મિત્રતાનું શું થયું? આ મોદી માટે એક ફટકો છે, કારણ કે ભારતીય વિપક્ષ તેમને પૂછી રહ્યો છે, તમારી મિત્રતા કયાં છે?
મોદી સરકારની નીતિઓના કટ્ટર ટીકાકાર રાજને કહ્યું કે અમેરિકા માટે ભારત પર સૌથી વધુ ટેરિફ લાદવું અને પછી લશ્કરી મિત્રતા, જોડાણો અને સંયુક્ત કવાયતો વિશે વાત કરવી અશકય છે. રાજને કહ્યું, અમેરિકા પર વિશ્વાસ કરી શકાતો નથી. ૧૯૭૧ના ભારત-પાકિસ્તાન યુદ્ધ દરમિયાન અમેરિકા પાકિસ્તાન પ્રત્યે પક્ષપાતી હતું. અમેરિકાએ પાકિસ્તાનને મદદ કરવા માટે પોતાનો સાતમો કાફલો મોકલ્યો. ભારતીયો આનાથી ખૂબ ગુસ્સે થયા, અને સોવિયેત સંઘે ભારતને મદદ કરી. આનાથી ભારત ૨૫ વર્ષ સુધી સોવિયેત બ્લોકમાં રહ્યું. તેમણે વધુમાં કહ્યું કે ભારતને તે બ્લોકમાંથી મુક્ત કરવામાં ઘણો સમય લાગ્યો.
તેમણે કહ્યું કે ભારત પાસે ઘણા વિકલ્પો નથી. તે ચીન સાથે સરહદ ધરાવે છે, જેની સાથે ભારતના સંબંધો સારા નથી. ભારત ચીન પર વિશ્વાસ કરતું નથી. ભારતીય બજારો ચીની માલથી છલકાઈ ગયા છે, જે સરકાર માટે ચિંતાનો વિષય છે. ભારત ચીની રોકાણનું સ્વાગત કરે છે પરંતુ ચીન પર નિર્ભર બનવાથી સાવધ છે. ભારતના જાપાન, ઓસ્ટ્રેલિયા અને અન્ય QUAD દેશો સાથે સારા સંબંધો છે, પરંતુ તે અમેરિકા સાથે પણ સંબંધ બનાવવા માંગતો હતો અને તે ખૂબ જ નિરાશ થયો હતો.
રાજને જણાવ્યું હતું કે ભારત પર ૫૦ ટકા ટેરિફથી વિવિધ ઉદ્યોગોને અલગ અલગ રીતે અસર થઈ છે. જ્યારે એપલ જેવી મોટી કંપનીઓને અસર ન થઈ શકે, ત્યારે નાની કંપનીઓને ૫૦ ટકા ટેરિફ હેઠળ અમેરિકામાં તેમના ઉત્પાદનો વેચવાનું અયોગ્ય લાગે છે. એકવાર આ સંબંધો તૂટી જાય પછી, તેમને ફરીથી બનાવવા મુશ્કેલ બની જાય છે. નાની અને મધ્યમ કદની કંપનીઓ સામાન્ય રીતે સૌથી વધુ પ્રભાવિત થાય છે. આ સમસ્યા જેટલી લાંબી ચાલશે, તેટલી જ તે મુશ્કેલ બનશે.
(3:55 PM IST)
છેલ્લા 8 દિવસમાં સૌથી લોકપ્રિય 
