કિવ: યુક્રેન અને રશિયા વચ્ચેનું યુદ્ધ ચરમસીમાએ છે, ત્યારે યુક્રેનિયન રાષ્ટ્રપતિ વોલોડીમિર ઝેલેન્સ્કી દેશની અંદર જ એક ગંભીર કટોકટીનો સામનો કરી રહ્યા છે. તેમના મિત્ર અને પૂર્વ બિઝનેસ પાર્ટનર પર દેશના સૌથી મોટા ભ્રષ્ટાચાર કૌભાંડનું આયોજન કરવાનો આરોપ લાગ્યો છે, જેના કારણે ઝેલેન્સ્કી સરકારની નીતિમત્તા પર સવાલો ઉભા થયા છે.

આ કૌભાંડના કેન્દ્રમાં રહેલા યુક્રેનના ભૂતપૂર્વ ઊર્જા મંત્રી તૈમુર મિન્ડિચ પર $100 મિલિયન (આશરે ₹૮૩૦ કરોડ) ની લાંચ અને ગેરઉપયોગનો આરોપ મૂકવામાં આવ્યો છે. યુક્રેનના રાષ્ટ્રીય ભ્રષ્ટાચાર વિરોધી બ્યુરો (NABU) અનુસાર, મિન્ડિચ એક એવા જૂથનું નેતૃત્વ કરી રહ્યા હતા, જેણે વ્યાવસાયિક સોદાના બદલામાં ઊર્જા કંપનીના કોન્ટ્રાક્ટરો પાસેથી લાખો ડોલર કમિશન અને લાંચ તરીકે મેળવ્યા હતા, અને આ નાણાં શેલ કંપનીઓ દ્વારા લોન્ડરિંગ કરવામાં આવ્યા હતા.

ભ્રષ્ટાચારના આરોપો જાહેર થતાં જ મિન્ડિચ યુક્રેન છોડીને ભાગી ગયા હતા. શરૂઆતમાં ઝેલેન્સ્કીએ આ મામલાને ગંભીરતાથી ન લીધો, પરંતુ વધતા જન દબાણને કારણે તેમને પોતાના મિત્ર સામે કાર્યવાહી કરવાની ફરજ પડી. રાજકીય વિશ્લેષકોએ ટિપ્પણી કરી છે કે, "આંતરિક વર્તુળ હંમેશા લગભગ દરેક યુક્રેનિયન રાષ્ટ્રપતિ માટે સમસ્યા રહ્યું છે," અને ઝેલેન્સ્કીનો મિત્રો પર વધુ પડતો વિશ્વાસ વિનાશક સાબિત થયો છે.

દરમિયાન, રશિયાએ આ ભ્રષ્ટાચારના મુદ્દે યુક્રેન પર આકરા પ્રહારો કર્યા છે. ક્રેમલિનના પ્રવક્તા દિમિત્રી પેસ્કોવે જણાવ્યું કે જે દેશો યુક્રેનને નાણાકીય સહાય પૂરી પાડે છે, તેમણે હવે જોવું જોઈએ કે તેમના કરદાતાઓના નાણાંનો મોટો હિસ્સો કિવ સરકાર દ્વારા ઉચાપત કરવામાં આવી રહ્યો છે.