નવી દિલ્હી : અમદાવાદમાં આ વર્ષે જૂન મહિનામાં થયેલા એર ઇન્ડિયા બોઇંગ ૭૮૭-૮ ડ્રીમલાઇનર વિમાન ક્રેશમાં ૨૬૦ લોકોના મોત થયા હતા. આ ગંભીર દુર્ઘટનાને લઈને સુપ્રીમ કોર્ટે આજે કેન્દ્ર સરકારને નોટિસ જારી કરીને જવાબ માંગ્યો છે. આ અરજી વિમાનના કમાન્ડ પાઇલટ કેપ્ટન સુમિત સભરવાલના પિતા પુષ્કરાજ સભરવાલ દ્વારા દાખલ કરવામાં આવી છે, જેમાં અકસ્માતની સ્વતંત્ર ન્યાયિક તપાસની માંગ કરવામાં આવી છે.

આજે સુનાવણી દરમિયાન, કેન્દ્ર સરકાર તરફથી હાજર રહેલા સોલિસિટર જનરલ તુષાર મહેતાએ દલીલ કરી હતી કે વિમાન ક્રેશ માટે કોઈને દોષી ઠેરવવામાં આવી રહ્યો નથી. તેમણે કહ્યું કે આંતરરાષ્ટ્રીય સંમેલન અને ઇન્ટરનેશનલ સિવિલ એવિએશન ઓર્ગેનાઇઝેશન (ICAO) ના નિયમો હેઠળ તપાસ ચાલી રહી છે, અને કોર્ટની દખલગીરીથી કેન્દ્રીય નાગરિક ઉડ્ડયન મંત્રાલય અને DGCA (નાગરિક ઉડ્ડયન મહાનિર્દેશાલય) ની ચાલી રહેલી તપાસ પર પ્રતિકૂળ અસર પડી શકે છે.

જસ્ટિસ સૂર્યકાંત અને જસ્ટિસ જોયમલ્યા બાગચીની બેન્ચ સમક્ષ કેપ્ટનના પિતા અને ફેડરેશન ઓફ ઇન્ડિયન પાઇલોટ્સ દ્વારા સંયુક્ત રીતે દાખલ કરાયેલી અરજીમાં આક્ષેપ કરાયો છે કે હાલની તપાસ અને તેનો પ્રારંભિક અહેવાલ ખામીયુક્ત છે. અરજદારે દલીલ કરી છે કે આ અહેવાલમાં દુર્ઘટનાનું કારણ ફક્ત પાઇલટની ભૂલ ને ઠેરવવામાં આવ્યું છે, જ્યારે અન્ય સ્પષ્ટ અને સંભવિત પ્રણાલીગત કારણોને અવગણવામાં આવ્યા છે.

અરજીમાં ઉડ્ડયન ક્ષેત્રના સ્વતંત્ર નિષ્ણાતો સાથે સુપ્રીમ કોર્ટના ન્યાયાધીશની આગેવાની હેઠળની ન્યાયિક રીતે દેખરેખ હેઠળની સમિતિની રચના કરવાની માંગ કરવામાં આવી છે. આ ઉપરાંત, એનજીઓ સેફ્ટી મેટર્સ ફાઉન્ડેશન દ્વારા દાખલ કરાયેલી અન્ય એક અરજીમાં દાવો કરાયો છે કે બોઇંગ ૭૮૭ ડ્રીમલાઇનરમાં ઘણી સિસ્ટમ નિષ્ફળતાઓ નોંધાઈ છે અને પ્લેનને ગ્રાઉન્ડેડ કરવાની જરૂર છે. જોકે, કોર્ટે 'એરલાઇન્સ વચ્ચેની લડાઈ' જેવી છાપ ન ઊભી થાય તેની ચેતવણી આપી હતી.