નવી દિલ્‍હી, તા.૧૪: અમળતસર-દિલ્‍હી હાઇવે પર શંભુ બોર્ડર શુક્રવારે (૧૪મી નવેમ્‍બર) સવારે ૭ વાગ્‍યાથી બંધ કરવામાં આવી હતી અને સાંજે ૬:૩૦ વાગ્‍યા સુધી બંધ રહેશે. કૌમી ઈન્‍સાફ મોરચા અને ખેડૂત સંગઠનો દ્વારા શંભુ બેરિયરથી વિરોધ કૂચની જાહેરાત બાદ પંજાબ અને હરિયાણા વહીવટીતંત્રે આ નિર્ણય લીધો છે.

સજા પૂર્ણ કરી ચૂકેલા શીખ કેદીઓને મુક્‍ત ન કરવાના વિરોધમાં, કૌમી ઈન્‍સાફ મોરચા અને ખેડૂત સંગઠનોએ દિલ્‍હી તરફ વિરોધ કૂચની જાહેરાત કરી છે. આમાં દિલ્‍હીના ગુરુદ્વારા સાહિબમાં પ્રાર્થના કરવાનો કાર્યક્રમ પણ સામેલ છે. જોકે, આ વિરોધ કૂચ માટે વહીવટીતંત્ર દ્વારા કોઈ પરવાનગી આપવામાં આવી નથી.

અહેવાલો અનુસાર, કૌમી ઈન્‍સાફ મોરચા અને અન્‍ય ખેડૂત સંગઠનોના સભ્‍યો આજે સવારે શંભુ બોર્ડર પર ભેગા થશે અને ત્‍યાંથી દિલ્‍હી તરફ કૂચ કરવાની યોજના બનાવી રહ્યા છે. જો કે, આ વિરોધ કૂચને રોકવા માટે પોલીસ વહીવટીતંત્રે પંજાબ અને હરિયાણાની બંને બાજુ બેરિકેડ લગાવી દીધા છે.

પંજાબ પોલીસે પંજાબની સરહદોમાં શંભુ બોર્ડર પર અંદાજે ૧૨૫ બેરિકેડ લગાવ્‍યા છે, અને ૫૦૦ પોલીસ કર્મચારીઓ સ્‍થળ પર હાજર રહેશે. આ પહેલા સુરક્ષા કારણોસર પંજાબ પોલીસ રાષ્‍ટ્રીય ધોરીમાર્ગ પર સતત પેટ્રોલિંગ પણ કરી રહી છે.

શંભુ સરહદ બંધ થવાને કારણે, પટિયાલા જિલ્લા વહીવટીતંત્રે પંજાબથી હરિયાણા જવા માટે વૈકલ્‍પિક માર્ગો ઓળખી કાઢયા છે. ફતેહગઢ સાહિબ-લાંદ્રાણ-એરપોર્ટ ચોક, મોહાલી-ડેરા બસ્‍સી-અંબાલા, રાજપુરા-બાનુર-ઝીરકપુર-ડેરા બસ્‍સી-અંબાલા, રાજપુરા-ઘન્નૌર-અંબાલા-દિલ્‍હી હાઈવે, પટિયાલા-ઘન્નૌર-અંબાલા-દિલ્‍હી હાઇવે અને બાનુર-મનૌલી-સુરત-લેહલી-લાલરુ-અંબાલા રૂટ પર ટ્રાફિક જામ અંગે પણ જિલ્લા વહીવટીતંત્રે ચિંતા વ્‍યક્‍ત કરી છે.