નવી દિલ્‍હી તા.૧૫: બિહાર વિધાનસભા ચૂંટણીમાં રાષ્ટ્રીય લોકશાહી જોડાણ (NDA) ની જંગી જીત બાદ, વડા પ્રધાન નરેન્‍દ્ર મોદીએ મુખ્‍યમંત્રી નીતિશ કુમારના નેતૃત્‍વની ખુલ્‍લેઆમ પ્રશંસા કરી, તેને સુશાસનનો વિજય ગણાવ્‍યો. આ નિવેદન રાજકીય રીતે મહત્‍વપૂર્ણ માનવામાં આવે છે, કારણ કે ચૂંટણી દરમિયાન વિપક્ષે સતત દાવો કર્યો હતો કે ભાજપ નીતિશ કુમારને ફરીથી મુખ્‍યમંત્રી નહીં બનાવે.

પીએમ મોદીએ સોશિયલ મીડિયા પ્‍લેટફોર્મ X પર પોસ્‍ટ કર્યું, સુશાસન જીત્‍યું છે. વિકાસ જીત્‍યો છે. જન કલ્‍યાણની ભાવના જીતી છે. સામાજિક ન્‍યાય જીત્‍યો છે. હું બિહારમાં મારા પરિવારના સભ્‍યોનો ખૂબ ખૂબ આભારી છું જેમણે ૨૦૨૫ ની વિધાનસભા ચૂંટણીમાં NDA ને ઐતિહાસિક અને અભૂતપૂર્વ વિજય સાથે આશીર્વાદ આપ્‍યા છે. આ પ્રચંડ જનાદેશ અમને લોકોની સેવા કરવા અને બિહાર માટે નવા સંકલ્‍પ સાથે કામ કરવા માટે સશક્‍ત બનાવશે.

પીએમ મોદી આગળ લખે છે, એનડીએએ રાજ્‍યમાં સર્વાંગી વિકાસ કર્યો છે. લોકોએ અમારા ટ્રેક રેકોર્ડ અને રાજ્‍યને નવી ઊંચાઈઓ પર લઈ જવાના અમારા વિઝનને ઓળખીને અમને પ્રચંડ બહુમતી આપી છે. હું મુખ્‍યમંત્રી નીતિશ કુમાર અને અમારા એનડીએ સાથી પક્ષો ચિરાગ પાસવાન, જીતન રામ માંઝી અને ઉપેન્‍દ્ર કુશવાહાને આ પ્રચંડ વિજય માટે હૃદયપૂર્વક અભિનંદન આપું છું.

નીતીશ કુમારને તેમના સમર્થકો સુશાસન બાબુૅ તરીકે ઓળખે છે. છેલ્‍લા બે દાયકામાં કાયદો અને વ્‍યવસ્‍થા, માર્ગ નિર્માણ, શિક્ષણ, આરોગ્‍ય અને મહિલા સશક્‍તિકરણ જેવા ક્ષેત્રોમાં તેમણે લાવેલા પરિવર્તનને કારણે તેમને આ ઉપનામ મળ્‍યું છે. વડા પ્રધાન મોદીના આ નિવેદનને નેતૃત્‍વ અંગે એનડીએમાં ઉભા થયેલા પ્રશ્નોના સીધા જવાબ તરીકે જોવામાં આવી રહ્યું છે.

ચૂંટણી પ્રચાર દરમિયાન, વિપક્ષે દાવો કર્યો હતો કે નીતિશ કુમારને બાજુ પર રાખીને ભાજપ પોતાની સરકાર બનાવશે, પરંતુ પરિણામો પછી પીએમ મોદીના સંદેશે આ બધી અટકળો પર વિરામ લગાવી દીધો. એનડીએની જીત સાથે, હવે નીતિશ કુમારના નેતૃત્‍વમાં બિહારમાં ફરી એકવાર સરકાર બનાવવાનો માર્ગ સ્‍પષ્ટ માનવામાં આવી રહ્યો છે.