દિલ્હીના લાલ કિલ્લા પાસે થયેલા કાર બ્લાસ્ટ કેસમાં તપાસ એજન્સીઓના હાથમાં મહત્વના પુરાવા લાગ્યા છે. જૈશ-એ-મોહમ્મદના આતંકવાદી ઉમરની એક નવી તસવીર સામે આવી છે, જેમાં તે ડોક્ટરના વેશમાં ગળામાં સ્ટેથોસ્કોપ પહેરેલો જોવા મળે છે. આ ઉપરાંત, હરિયાણાના ફરીદાબાદમાં એક મોબાઈલ ફોનની દુકાનનું સીસીટીવી ફૂટેજ પણ મળ્યું છે, જેમાં તે હુમલાનું ષડયંત્ર રચતો સ્પષ્ટ દેખાઈ રહ્યો છે.
આ આતંકી મોડ્યુલની તપાસનો રેલો હવે હરિયાણાની અલ ફલાહ યુનિવર્સિટી સુધી પહોંચ્યો છે. દિલ્હી પોલીસની ક્રાઈમ બ્રાન્ચે યુનિવર્સિટી વિરુદ્ધ બે અલગ-અલગ એફઆઈઆર નોંધી છે. યુનિવર્સિટી પર આતંકી મોડ્યુલને મદદ કરવાનો અને શંકાસ્પદ ગતિવિધિઓમાં સંડોવાયેલા હોવાનો ગંભીર આરોપ છે. અગાઉ પણ આ યુનિવર્સિટી સાથે જોડાયેલા બે ડોક્ટરોની ધરપકડ કરવામાં આવી હતી.