પટના: બિહાર વિધાનસભા ચૂંટણી ૨૦૨૫ના પરિણામોએ રાજ્યના રાજકારણમાં એક નવો અને આશ્ચર્યજનક ટ્રેન્ડ દર્શાવ્યો છે. NDA એ પ્રચંડ બહુમતી મેળવતા અને મહાગઠબંધનની કારમી હાર વચ્ચે, આ વખતે વિધાનસભામાં ચૂંટાયેલા મુસ્લિમ ધારાસભ્યોની સંખ્યા ઘટીને માત્ર ૧૧ થઈ ગઈ છે. આ આંકડો ૧૯૫૧-૫૨ની પહેલી વિધાનસભા ચૂંટણી પછીનો સૌથી ઓછો છે, જ્યારે બિહારમાં મુસ્લિમ વસ્તી આશરે ૧૮% છે.

 આ ૧૧ મુસ્લિમ ધારાસભ્યોમાં અસદુદ્દીન ઓવૈસીની પાર્ટી AIMIM નું પ્રદર્શન નોંધપાત્ર રહ્યું છે, જેમણે સીમાંચલ ક્ષેત્રમાં પાંચ બેઠકો જીતીને પોતાનું વર્ચસ્વ જાળવી રાખ્યું છે. આ ઉપરાંત, ત્રણ મુસ્લિમ ધારાસભ્યો RJDમાંથી, બે કોંગ્રેસમાંથી અને એક JDUમાંથી જીત્યા છે.

AIMIM ની જીતને કારણે ઓવૈસીએ RJD સાથે ૨૦૨૦ના અપમાનનો સ્કોર સેટ કરી લીધો છે. ૨૦૨૦માં AIMIMના પાંચ ધારાસભ્યો જીત્યા હતા, જેમાંથી RJD એ થોડા મહિના પછી ચારને પોતાની તરફ ખેંચી લીધા હતા. જોકે, ૨૦૨૫ની ચૂંટણીમાં AIMIM એ એવી ત્રણ બેઠકો (જોકીહાટ, કોચધામન અને બૈસી) પર ફરી કબજો કર્યો છે, જ્યાં તેમના ધારાસભ્યો જીત્યા પછી RJD માં જોડાયા હતા. આ પરિણામો સીમાંચલના મુસ્લિમ મતદારો પર ઓવૈસીની પાર્ટીનો પ્રભાવ યથાવત હોવાનું સ્પષ્ટપણે દર્શાવે છે.