નવી દિલ્હી/લખનઉ: 10 નવેમ્બરના રોજ દિલ્હીના લાલ કિલ્લા વિસ્ફોટમાં સંડોવણી બદલ લખનઉની રહેવાસી ડૉ. શાહીન સઈદની ધરપકડ બાદ ચોંકાવનારા ખુલાસા થયા છે. રાષ્ટ્રીય તપાસ એજન્સી (NIA)ના વરિષ્ઠ અધિકારીઓના જણાવ્યા અનુસાર, ડૉ. શાહીન સઈદ છેલ્લા 10 વર્ષથી પાકિસ્તાન સમર્થિત આતંકવાદી સંગઠન જૈશ-એ-મોહમ્મદ (JeM) સાથે ગુપ્ત રીતે સંકળાયેલી હતી. તે 2015માં જૈશમાં જોડાઈ હતી અને એક વર્ષ સુધી સંવેદનશીલ માહિતી પહોંચાડ્યા બાદ 2016માં તે સંગઠનની સક્રિય સભ્ય બની હતી. સુરક્ષા એજન્સીઓ માટે આ એક ગંભીર ચિંતાનો વિષય છે કે એક વ્હાઇટ કોલર આતંકવાદી મોડ્યૂલ આટલા વર્ષોથી કાવતરું ઘડી રહ્યું હતું.
ડૉ. શાહીન સઈદનું આ ડબલ લાઇફ એટલું ગુપ્ત હતું કે તેણે પોતાના પરિવાર અને નોકરીને પણ છોડી દીધી હતી. 2021માં જ્યારે એક સંબંધીએ તેને આ વિશે પૂછ્યું ત્યારે તેનો જવાબ અત્યંત આતંકવાદી માનસિકતા દર્શાવતો હતો. શાહીને કહ્યું હતું, "પરિવાર અને નોકરીનો શું અર્થ છે? હું મારા માટે પૂરતું જીવી ચૂકી છું. હવે મારા સમુદાયનું ઋણ ચૂકવવાનો સમય આવી ગયો છે." તેણે ઉમેર્યું હતું, "મારી ચિંતા કરવાનું બંધ કરો, હું કંઈક મોટું કરવાની તૈયારી કરી રહી છું. હું જે પણ કરીશ, તમને બધાને તેનો ગર્વ થશે."
તપાસમાં જાણવા મળ્યું છે કે આતંકવાદી સંગઠનમાં ડૉ. શાહીન સઈદને 'મેડમ સર્જન' કહીને બોલાવવામાં આવતી હતી. આ સિવાય, તપાસ એજન્સીઓએ શાહીનના સહયોગી ડૉ. મુઝમ્મિલની ડાયરીમાંથી "ઓપરેશન હમદર્દ" નામની એક ભયાનક યોજનાનો પર્દાફાશ કર્યો છે. આ ઓપરેશનનો હેતુ મુસ્લિમ છોકરીઓને આતંકી હુમલાઓ માટે તૈયાર કરવાનો હતો અને ડૉ. શાહીન આ કાર્યને અંજામ આપવાની હતી.
આ સમગ્ર નેટવર્કમાં 25-30 લોકો જોડાયેલા છે અને તેના તાર જમ્મુ-કાશ્મીર તેમજ ફરીદાબાદ સુધી ફેલાયેલા છે. એક ડૉક્ટરનું 10 વર્ષ સુધી આતંકવાદી પ્રવૃત્તિઓમાં સામેલ થવું, તેનું ડબલ લાઇફ જીવવું અને આતંકવાદીઓ દ્વારા 'મેડમ સર્જન' તરીકે ઓળખાવું, આ સમગ્ર પ્રકરણ ભારતમાં આતંકવાદની નવી પેટર્ન તરફ ઇશારો કરે છે.