આ છે હકીકત...દર ચારમાંથી એક અમેરિકન પાસે ઘર ચલાવવા કોઈ જ બચત નથી
અફોર્ડેબિલિટી ક્રાઈસિસ વધતા ૨૫ ટકા અમેરિકન્સ માટે ઘરનું ઘર અને કાર ખરીદવા લગભગ અશક્ય થઈ ગયું છે : ૨૪ ટકા અમેરિકન્સ આવકનો ૯૫ ટકા ભાગ જીવનજરૂરી ચીજવસ્તુઓ પાછળ જ ખર્ચી નાખે છે, જેથી તેમની પાસે વેકેશન પર જવાના તો ઠીક, ફેમિલી સાથે ડિનર માટે ક્યાંક બહાર જવાના પૈસા પણ નથી વધતા
ન્યુયોર્ક તા.૧૭: ઈન્ડિયામાં જેમ રોજનું કમાઈ ખાનારા લોકોનો એક વર્ગ છે તેમ અમેરિકા જેવા વિકસિત દેશમાં પણ ૨૫ ટકા લોકોની હાલત કંઈક આવી જ છે. યુએસમાં આવા લોકોને પેચેક ટુ પેચેક પર જીવતા લોકો કહેવાય છે, મતલબ કે તેમની પાસે કોઈ બચત નથી અને જો કોઈ કારણોસર તેમની આવક બંધ થઈ જાય તો તેઓ મોટી મુશ્કેલીમાં આવી જાય તેમ છે. અમેરિકન્સ આમેય બચત કરવામાં કંઈ ખાસ વિશ્વાસ નથી રાખતા પરંતુ દરેક ચોથા અમેરિકનની સ્થિતિ એવી છે કે તે ચાહીને પણ કોઈ બચત કરી શકે તેમ નથી.
બેંક ઓફ અમેરિકા ઈન્સ્ટિટ્યૂટ એનાલિસિસના એક રિપોર્ટ અનુસાર, ૨૦૨૫માં ૨૪ ટકા અમેરિકન પેચેક ટુ પેચેક પર જીવતા હતા. બેંકે પોતાના લાખો કસ્ટમર્સના ડેટાનું એનાલિસિસ કરી આ રિપોર્ટ તૈયાર કર્યો હતો જેમાં લોકો પોતાની આવકનો કેટલો ભાગ ઘર, ગેસોલિન, ગ્રોસરી તેમજ ચાઈલ્ડ કેર અને યુટિલિટી પાછળ ખર્ચે છે તે જાણવાનો પ્રયાસ કરાયો હતો. આ એનાલિસિસમાં એવું જાણવા મળ્યું હતું કે ૨૪ ટકા અમેરિકન્સ આવકનો ૯૫ ટકા ભાગ જીવનજરૂરી ચીજવસ્તુઓ પાછળ જ ખર્ચી નાખે છે, જેથી તેમની પાસે વેકેશન પર જવાના તો ઠીક, ફેમિલી સાથે ડિનર માટે ક્યાંક બહાર જવાના પૈસા પણ નથી વધતા.
ખાસ તો પોતાની ફેમિલી શરૂ કરવા માગતા જે ૨૫-૩૫ વર્ષના યંગસ્ટર્સ આ સ્થિતિમાં જીવી રહ્યા છે તેમના માટે તો કાર અને ઘર ખરીદવા લગભગ અશક્ય થઈ ગયા છે કારણકે તેમની પાસે ડાઉનપેમેન્ટના પૈસા પણ નથી રહ્યા. આટલું ઓછું હોય તેમ ઘણા તો સ્ટૂડન્ટ લોનના હપ્તા ભરવામાં પણ હાંફી રહ્યા છે કારણકે તેમની પાસે સારી કહી શકાય તેવી કોઈ જોબ્સ જ નથી. બેન્ક ઓફ અમેરિકાનો આ રિપોર્ટ કે-શેપ ઈકોનોમીનો પણ પુરાવો આપે છે જેમાં એક તરફ સારૂં કમાતા લોકો છે અને બીજી તરફ એવા લોકો છે કે જેમની પાસે રહેવા-જમવાનો ખર્ચો કાઢવા ઉપરાંત મકાનનું ભાડું અને યુટિલિટી બિલ ચૂકવ્યા બાદ લગભગ કશુંય નથી બચતું.
યુએસમાં હાલ જોવા મળી રહેલી અફોર્ટેબિલિટી ક્રાઈસિસ સરકાર માટે પણ ચિતાનો વિષય બની રહી છે. ટ્રમ્પ ભલે જાહેરમાં આ વાતનો સ્વીકાર કરવા તૈયાર ના હોય પરંતુ હકીકત એ છે કે ચાલુ વર્ષમાં રોજનું કમાઈને ખાતા હોય તેવી સ્થિતિમાં જીવતા લોકોની સંખ્યામાં થઈ રહેલો વધારો ભલે મંદ પડ્યો હોય પરંતુ તેમ છતાંય બેન્ક ઓફ અમેરિકાનો રિપોર્ટ એવું જણાવે છે કે ૨૦૨૩માં પેચેક ટુ પેચેક જીવતા લોકોનું પ્રમાણ ૨૭ ટકા હતું જે હાલ ૨૯ ટકા સુધી પહોંચી ગયું હોવાની શક્યતા છે. જોકે , ટ્રમ્પ આ સ્થિતિનો અંદેશો આપતા રિપોર્ટ્સને ફેક કહી દે છે અને ડેમોક્રેટ્સ આવા ફેક પોલ કરાવે છે તેવા દાવા કરે છે.
બેન્ક ઓફ અમેરિકા ઈન્સ્ટિટ્યૂટના ઈકોનોમિસ્ટ જો વેડફોર્ડે આ અંગે CNN સાથે વાત કરતા જણાવ્યું હતું કે ઉંચી આવક ધરાવતા અને નીચી આવક ધરાવતા લોકો જાણે અલગ જ દુનિયામાં રહે છે. તેમાંય સૌથી મોટી સમસ્યા એ છે કે ઓછી આવક ધરાવતા લોકોની આવકમાં થતો વધારો ફુગાવામાં થઈ રહેલા વધારા કરતા ઓછો રહે છે. અમેરિકન્સને આફટર ટેક્સ મળતા વેજિસમાં થયેલા વધારાની વાત કરીએ તો મિડલ ઈનકમ ધરાવતા લોકોના પગાર ૨ ટકા વધ્યા છે જ્યારે ફુગાવો ૩ ટકા વધ્યો છે, જ્યારે લોઅર ઈનકમ ધરાવતા લોકોના આફટર ટેક્સ વેજિસ ૨૦૨૫માં માત્ર એક જ ટકા વધ્યા છે.
તો બીજી તરફ, હાઈ-ઈનકમ અમેરિકન્સના ટેક્સ કાપ્યા બાદના પગારમાં ચાર ટકાનો વધારો થયો છે જે ઈન્ફલેક્શન કરતા વધારે છે. મતલબ કે સૌથી વધુ આર્થિક ફાયદો જેમના પગાર સૌથી વધારે છે તે જેવા જ થઈ રહ્યો છે. ખાસ તો મિલેનિયલ્સની આવકમાં થતો વધારો તો ઈન્ફલેશન કરતાં ઘણો જ ઓછો રહ્યો છે
અર્થશાષાીઓનું માનવું છે કે પેચેક ટુ પેચેક પર જીવતા લોકોની સંખ્યા વધવાની બાબત એ વાતનો પણ સંકેત આપી રહી છે કે અમેરિકામાં અફોર્ડેબિલિટી ક્રાઈસિસ ઘેરી બની રહી છે. યુએસની ઈકોનોમી માંગ આધારિત એટલે કે કન્ઝ્યુમર ડ્રિવન મનાય છે, પરંતુ આવકમાં થઈ રહેલો વધારો સાવ ઓછો થઈ જતાં ઘણા લોકોએ ખરીદી પણ ઓછી કરી નાખી છે જેથી ઈકોનોમીમાં ઓવરઓલ ડિમાન્ડ ઘટી રહી છે. આ ઉપરાંત દેશમાં બેરોજગારોની સંખ્યામાં પણ સતત વધારો થઈ રહ્યો છે. પબ્લિકની આવક ઘટી રહી હોવાથી લોન ભરવામાં ડિફોલ્ટ થયા હોય તેવા લોકોની સંખ્યા પણ વધી રહી છે.(૩૮.૪)
(10:08 AM IST)
છેલ્લા 8 દિવસમાં સૌથી લોકપ્રિય 
