નવી દિલ્હી, (સંરક્ષણ પ્રતિનિધિ) : ભારતીય નૌકાદળે સ્વદેશી સંરક્ષણ ક્ષેત્રે એક મોટું પગલું ભરતાં, સ્વદેશી રીતે ડિઝાઇન અને નિર્મિત માહે-ક્લાસ એન્ટિ-સબમરીન વોરફેર શેલો વોટર ક્રાફ્ટ (ASW-SWC) શ્રેણીના પ્રથમ જહાજ 'માહે' ના ક્રેસ્ટનું અનાવરણ કર્યું છે. સંરક્ષણ મંત્રાલય દ્વારા જાહેર કરાયેલા આ ક્રેસ્ટની ડિઝાઇન કેરળના સમૃદ્ધ સાંસ્કૃતિક અને લશ્કરી વારસાથી પ્રેરિત છે.

આ ક્રેસ્ટમાં 'ઉરુમી' નામની લવચીક તલવાર દર્શાવવામાં આવી છે, જે કેરળની પ્રાચીન માર્શલ આર્ટ કલારિપાયટ્ટુ સાથે સંકળાયેલી છે અને રાજ્યના પરાક્રમી લશ્કરી વારસાનું પ્રતીક છે. મંત્રાલયે ભારપૂર્વક જણાવ્યું કે આ ક્રેસ્ટ દેશના સાંસ્કૃતિક વારસા અને ટેકનોલોજીકલ કૌશલ્યના સંગમનું પ્રતીક છે, જે સ્વદેશીકરણ, નવીનતા અને આત્મનિર્ભરતા પ્રત્યે નૌકાદળની અતૂટ પ્રતિબદ્ધતામાં વધુ એક સીમાચિહ્ન દર્શાવે છે.

'માહે' જહાજનું સૂત્ર "સાયલન્ટ હન્ટર્સ" (Silent Hunters) રાખવામાં આવ્યું છે, જે ગુપ્તતા, સતર્કતા અને અટલ સંકલ્પને મૂર્તિમંત કરે છે. ભારતીય નૌકાદળ દ્વારા આ શક્તિશાળી જહાજને 24 નવેમ્બરના રોજ મુંબઈમાં સત્તાવાર રીતે કમિશન કરવામાં આવશે.