નવી દિલ્હી: ભારતના ઓટોમોબાઇલ ઉદ્યોગ માટે એક મોટા સકારાત્મક સમાચાર સામે આવ્યા છે. સોમવારે ગ્રાન્ટ થોર્ન્ટન ઈન્ડિયા અને ઈન્ડો-જાપાન ચેમ્બર ઓફ કોમર્સ એન્ડ ઇન્ડસ્ટ્રી (IJCCI) દ્વારા સંયુક્ત રીતે પ્રકાશિત કરાયેલા એક અહેવાલ મુજબ, દેશમાં લાગુ કરાયેલા GST 2.0 સુધારા, કસ્ટમ ડ્યુટીમાં ઘટાડો અને ભારત-જાપાન મુક્ત વેપાર કરારના કારણે આ ક્ષેત્રમાં જબરદસ્ત તેજી આવવાની સંભાવના છે.

રિપોર્ટ અનુસાર, સપ્ટેમ્બરમાં લાગુ કરાયેલ GST 2.0 ઓટોમોબાઇલ ક્ષેત્ર માટે પરિવર્તનકારી સાબિત થયો છે. 350 cc થી ઓછી ક્ષમતાવાળી નાની કારો અને મોટરસાયકલો પરનો GST અગાઉના 28% (વત્તા સેસ) થી ઘટાડીને માત્ર 18% કરવામાં આવ્યો છે. આ ઘટાડાના પરિણામે પસંદગીના મોડેલોના ભાવમાં ₹1 લાખ સુધીનો ઘટાડો નોંધાયો છે.

નાની કાર સેગમેન્ટમાં 50% બુકિંગ વધ્યું!: GST માં ઘટાડો થતાં ગ્રાહકોનો રસ નોંધપાત્ર રીતે વધ્યો છે. અહેવાલમાં જણાવાયું છે કે, નાની કાર સેગમેન્ટમાં બુકિંગ વોલ્યુમમાં 50 ટકાનો વધારો જોવા મળ્યો છે. બીજી તરફ, ઇલેક્ટ્રિક વાહનો (EVs) પર માત્ર 5% GST લાગુ થાય છે, જે EV ને અપનાવવામાં મદદ કરશે.

ગ્રાન્ટ થોર્ન્ટન ઇન્ડિયાના સોહરાબ બરારિયાએ કહ્યું, "GST 2.0 અને લક્ષિત કસ્ટમ પ્રોત્સાહનોનું સંયોજન ભારતના ઓટોમોટિવ ક્ષેત્ર માટે એક નિર્ણાયક ક્ષણ છે. આ પગલાંથી ભારતની સ્પર્ધાત્મકતા વધશે અને જાપાની ઓટોમેકર્સ માટે તે ઉત્પાદન અને નિકાસ કેન્દ્ર તરીકે મજબૂત બનશે."

ભારતીય ઓટોમોબાઇલ ઉદ્યોગ હાલમાં GDP માં 7.1 ટકાનું યોગદાન આપે છે. અંદાજ છે કે 2024 માં દેશમાં 28 મિલિયન વાહનોનું ઉત્પાદન થશે, જે 2023 ની સરખામણીમાં 8 ટકાનો વધારો દર્શાવે છે. આ સુધારાઓથી ભારતમાં રોકાણ વધશે અને જાપાન સાથેની ભાગીદારી મજબૂત બનશે.