નવી દિલ્હી: ભારતીય સુરક્ષા એજન્સીઓ માટે આ એક મોટી સફળતા છે. જેલમાં બંધ કુખ્યાત ગેંગસ્ટર લોરેન્સ બિશ્નોઈનો ભાઈ અને ઘણા હાઈ-પ્રોફાઇલ કેસોમાં વોન્ટેડ આરોપી અનમોલ બિશ્નોઈને અમેરિકાથી દેશનિકાલ (deportation) કર્યા બાદ આજે ભારત લાવવામાં આવ્યો છે. તેની સામે દેશભરમાં લગભગ ૧૮ જેટલા ગુનાહિત કેસ નોંધાયેલા છે. અમેરિકાથી પરત ફરતા જ રાષ્ટ્રીય તપાસ એજન્સી (NIA) દ્વારા તેની ઔપચારિક રીતે ધરપકડ કરવામાં આવી હતી અને ત્યારબાદ તેને દિલ્હીની પટિયાલા હાઉસ કોર્ટમાં રજૂ કરવામાં આવ્યો હતો.

પંજાબના ફાઝિલ્કાનો રહેવાસી અનમોલ, ૨૦૨૨માં પંજાબી ગાયક સિદ્ધુ મૂસેવાલાની હત્યા બાદ કથિત રીતે નકલી પાસપોર્ટ પર દેશ છોડીને ભાગી ગયો હતો. NIA તેની ૨૦૨૨માં થયેલી મૂસેવાલાની હત્યા, ૨૦૨૪માં મહારાષ્ટ્રના ભૂતપૂર્વ મંત્રી અને NCP નેતા બાબા સિદ્દીકીની હત્યા, અને અભિનેતા સલમાન ખાનના મુંબઈ નિવાસસ્થાન બહાર થયેલા ગોળીબાર જેવા મોટા કેસોમાં તેની ભૂમિકા પર તપાસ કરી રહી છે.

તપાસકર્તાઓના મતે, અનમોલ અમેરિકામાં રહીને જ તેના ભાઈ લોરેન્સ બિશ્નોઈ માટે મુખ્ય ઓપરેશન્સનું સંચાલન કરતો હતો. જેમાં ગેંગના કાર્યકરોને છુપાવવાના સ્થળો, હથિયારો અને લોજિસ્ટિકલ મદદ પૂરી પાડવાનો તેમજ વિદેશમાંથી ખંડણીના રેકેટ ચલાવવાનો પણ સમાવેશ થાય છે. ગયા વર્ષે યુ.એસ.માં નકલી દસ્તાવેજો સાથે મુસાફરી કરવાના આરોપમાં તેની ધરપકડ કરવામાં આવી હતી.

૨૦૨૩માં NIA દ્વારા તેની વિરુદ્ધ ચાર્જશીટ દાખલ કરવામાં આવ્યા બાદ ભારતે ગયા વર્ષે જાન્યુઆરીમાં તેના પ્રત્યાર્પણની સત્તાવાર વિનંતી કરી હતી. NIA એ અનમોલ અને ગોલ્ડી બ્રાર પર ૨૦૨૦ થી ૨૦૨૩ દરમિયાન આતંકવાદ સંબંધિત પ્રવૃત્તિઓમાં લોરેન્સ બિશ્નોઈને મદદ કરવાનો આરોપ મૂક્યો હતો અને તેના પર ₹૧૦ લાખનું ઈનામ પણ જાહેર કર્યું હતું. ગયા અઠવાડિયે યુ.એસ. કોર્ટે તેની આશ્રય અરજી ફગાવી દેતાં, ભારતમાં તેની વાપસીનો રસ્તો ખુલી ગયો હતો.