રોમ, ૧૯ નવેમ્બર, ૨૦૨૫: ભારતે ખાદ્ય સુરક્ષા અને ગુણવત્તાના ક્ષેત્રમાં પોતાનું આંતરરાષ્ટ્રીય કદ મજબૂત કર્યું છે. રોમમાં આયોજિત ૪૮મા કોડેક્સ એલિમેન્ટેરિયસ કમિશન (CAC48) ના સત્રમાં ભારત એશિયા ક્ષેત્ર માટે કોડેક્સ એક્ઝિક્યુટિવ કમિટી (Codex Executive Committee) માં ફરીથી ચૂંટાયું છે.

આરોગ્ય અને પરિવાર કલ્યાણ મંત્રાલય દ્વારા આપવામાં આવેલા નિવેદન મુજબ, રોમમાં આયોજિત આ સત્રમાં ભારતીય પ્રતિનિધિમંડળનું નેતૃત્વ ફૂડ સેફ્ટી એન્ડ સ્ટાન્ડર્ડ્સ ઓથોરિટી ઓફ ઇન્ડિયા (FSSAI) ના મુખ્ય કાર્યકારી અધિકારી (CEO) રજિત પુન્હાનીએ કર્યું હતું.

ખાદ્ય ધોરણો અને ટેક્નોલોજી પર ભાર: ભારતે આ સત્ર દરમિયાન ખાદ્ય ધોરણોને અપડેટ અને વિકસાવવા પર વિશેષ ભાર મૂક્યો હતો. જેમાં મુખ્યત્વે:
ખાદ્ય ઉમેરણો (Food Additives)
જંતુનાશકોના અવશેષો (Pesticide Residues)
પશુચિકિત્સા દવાઓ (Veterinary Drugs)
ખોરાકમાં દૂષકો (Contaminants in food)
વિશ્લેષણની પદ્ધતિઓ
નો સમાવેશ થાય છે. આ ઉપરાંત, ભારતે કોડેક્સ કામગીરીની કાર્યક્ષમતા સુધારવા માટે, ખાસ કરીને દસ્તાવેજ અનુવાદના સંબંધમાં આર્ટિફિશિયલ ઇન્ટેલિજન્સ (AI) સહિતની આધુનિક તકનીકોના ઉપયોગને પણ સમર્થન આપ્યું હતું.

મંત્રાલયે પુષ્ટિ કરી કે આ પુનઃચૂંટણી ભારતની સહયોગી નેતૃત્વ ભૂમિકાને મજબૂત કરે છે અને ભારત ૨૦૨૭ માં CAC50 ના અંત સુધી આ ભૂમિકા નિભાવશે.