ન્યૂ જર્સી: યુનાઇટેડ સ્ટેટ્સના ન્યૂ જર્સીના બર્લિંગ્ટન કાઉન્ટીમાં ૨૦૧૭માં ભારતીય મહિલા શશિકલા નારા અને તેના છ વર્ષના પુત્ર અનિશ નારાની છરીના ઘા મારીને કરવામાં આવેલી કરૂણ હત્યાના કેસમાં આઠ વર્ષ પછી મોટો વળાંક આવ્યો છે. અધિકારીઓએ હવે આ કેસમાં કથિત હત્યારા નઝીર હમીદ સામે ઔપચારિક રીતે આરોપો જાહેર કર્યા છે, જે પીડિતાના પતિનો સહકર્મચારી હતો અને હત્યાના છ મહિના પછી ભારત પાછો ફર્યો હોવાનું કહેવાય છે.

DNA પુરાવાથી આરોપીની ઓળખ: માર્ચ ૨૦૧૭માં, શશિકલા અને અનિશની તેમના મેપલ શેડ એપાર્ટમેન્ટમાં હત્યા કરવામાં આવી હતી, જ્યાં તેમને પતિ હનુ નારાએ મૃત હાલતમાં જોયા હતા. હત્યાના આઠ વર્ષ પછી, તપાસકર્તાઓને નિર્ણાયક સફળતા મળી છે. બર્લિંગ્ટન કાઉન્ટીના પ્રોસિક્યુટર લાચિયા બ્રેડશોએ જણાવ્યું કે, હમીદના DNA નમૂના મેળવવાના પ્રયાસો વર્ષોથી ચાલી રહ્યા હતા. આખરે, હમીદના ભૂતપૂર્વ એમ્પ્લોયર, કોગ્નિઝન્ટ ટેકનોલોજી સોલ્યુશન્સે તેનું લેપટોપ પાછું આપ્યું, જેનાથી ડિટેક્ટીવ્સને DNA નમૂના મળ્યા. આ નમૂનાએ પુષ્ટિ કરી કે ઘટનાસ્થળેથી મળેલું લોહી હમીદનું હતું.

યુએસ સરકારની ભારતને પ્રત્યાર્પણ માટે વિનંતી: નઝીર હમીદ પર આરોપ મૂકવામાં આવ્યો છે કે તે એ જ એપાર્ટમેન્ટ કોમ્પ્લેક્સમાં રહેતો હતો અને હત્યાના છ મહિના પછી ભારત પાછો ફર્યો હતો, જ્યાં તે હજી પણ હોવાનું માનવામાં આવે છે. પ્રોસિક્યુટર લાચિયા બ્રેડશોએ યુએસ સરકાર અને ભારત સરકારને વિનંતી કરી છે કે: "અમે યુનાઇટેડ સ્ટેટ્સ સરકાર અને ભારત સરકારને આ વ્યક્તિને વિલંબ કર્યા વિના પ્રત્યાર્પણ કરવા માટે ઝડપી અને નિર્ણાયક પગલાં લેવા હાકલ કરીએ છીએ."

પીડિત પરિવારના વકીલે અધિકારીઓની પ્રશંસા કરતા કહ્યું કે, "પરિવાર બધા અધિકારીઓની ખૂબ પ્રશંસા કરે છે. તેઓએ હાર ન માની. તેઓ લડતા રહ્યા." જોકે, અધિકારીઓએ સ્વીકાર્યું છે કે હત્યાનો હેતુ હજી પણ સંપૂર્ણપણે જાણી શકાયો નથી. આ દંપતી આંધ્રપ્રદેશના હતા અને હત્યાના સમયે ૧૨ વર્ષથી યુએસમાં IT ક્ષેત્રમાં કામ કરી રહ્યા હતા.