દુબઈ: દુબઈ એર શો દરમિયાન શુક્રવારે સ્થાનિક સમય મુજબ બપોરે 2:10 વાગ્યે એક ગંભીર અકસ્માત સર્જાયો હતો, જેમાં ભારતીય વાયુસેનાનું સ્વદેશી નિર્મિત HAL તેજસ લાઇટ કોમ્બેટ એરક્રાફ્ટ હવાઈ પ્રદર્શન દરમિયાન ક્રેશ થયું હતું. આ દુર્ઘટનાના પરિણામે વિમાનના પાઇલટનું કરૂણ મૃત્યુ થયું છે.

હજારો દર્શકોની સામે, તેજસ વિમાને ઊંચી ઝડપે અને ઊંચાઈએ ઉડાન ભરતી વખતે અચાનક કાબુ ગુમાવ્યો અને જમીન પર ધડાકાભેર અથડાયું. આ અથડામણના કારણે જોરદાર વિસ્ફોટ થયો અને આકાશમાં કાળા ધુમાડાના ગોટેગોટા છવાઈ ગયા.

વાયુસેનાએ શોક વ્યક્ત કર્યો: અકસ્માત પછી તાત્કાલિક ઇમરજન્સી સેવાઓ ઘટનાસ્થળે પહોંચી હતી, પરંતુ પાઇલટને ગંભીર ઇજાઓ થતાં તેનું મૃત્યુ થયું હતું, જેની પુષ્ટિ ભારતીય વાયુસેના (IAF) એ પાછળથી કરી હતી.

ભારતીય વાયુસેનાએ આ દુઃખદ ઘટના પર ઊંડો શોક વ્યક્ત કરતાં જણાવ્યું હતું કે, "આ અકસ્માત અત્યંત દુર્ભાગ્યપૂર્ણ હતો અને સમગ્ર સંસ્થા શહીદ પાઇલટના પરિવાર સાથે સંવેદના વ્યક્ત કરે છે."

વાયુસેનાએ વધુમાં સ્પષ્ટ કર્યું છે કે અકસ્માતનું ચોક્કસ કારણ નક્કી કરવા માટે કોર્ટ ઓફ ઇન્ક્વાયરી (CoI) ની સ્થાપના કરવામાં આવશે. આ તપાસમાં ટેકનિકલ ખામી, હવામાનની સ્થિતિ કે માનવીય ભૂલ જેવા તમામ પાસાઓની ચકાસણી કરવામાં આવશે.

તેજસ વિમાન, જેને ભારતની સંરક્ષણ ક્ષમતાઓ અને સ્વદેશી એરોસ્પેસ ટેકનોલોજીના પ્રતીક તરીકે જોવામાં આવે છે, તેના ક્રેશથી એર શો અને સંરક્ષણ ક્ષેત્ર બંનેને મોટો આંચકો લાગ્યો છે.