અંબરનાથ, થાણે: મહારાષ્ટ્રના અંબરનાથ શહેરમાં ચૂંટણી પ્રચારના માહોલ વચ્ચે એક ભયાનક માર્ગ અકસ્માતે હાહાકાર મચાવ્યો છે. શહેરના વ્યસ્ત ફ્લાયઓવર પર કાર ચલાવી રહેલા ડ્રાઇવરને અચાનક હાર્ટ એટેક આવતા કાર પરનો કાબૂ ગુમાવ્યો હતો, જેના કારણે બેકાબૂ કારે અનેક વાહનોને ટક્કર મારી. આ ગમખ્વાર ઘટનામાં ચાર નિર્દોષ લોકોએ જીવ ગુમાવ્યા છે, જ્યારે શિવસેનાના ઉમેદવાર કિરણ ચૌબે સહિત ચાર લોકો ગંભીર રીતે ઘાયલ થયા છે. અકસ્માત એટલો ગંભીર હતો કે તેના સીસીટીવી ફૂટેજ જોઈને લોકો સ્તબ્ધ થઈ ગયા છે.
આ દુર્ઘટના ત્યારે ઘટી જ્યારે શિવસેનાના ઉમેદવાર કિરણ ચૌબે તેમના ડ્રાઇવર લક્ષ્મણ શિંદે સાથે બુવા પાડા વિસ્તારમાં ચૂંટણી પ્રચાર માટે જઈ રહ્યા હતા. ફ્લાયઓવર પર પહોંચતા જ ડ્રાઇવર લક્ષ્મણ શિંદેને અચાનક હૃદયરોગનો હુમલો આવ્યો, જેના કારણે કાર ડિવાઇડર ઓળંગીને સામેથી આવતા વાહનો સાથે ધડાકાભેર અથડાઈ હતી. આ ભયાનક ટક્કરમાં ડ્રાઇવર લક્ષ્મણ શિંદેનું ઘટનાસ્થળે જ મૃત્યુ થયું હતું. તેમની સાથે અંબરનાથ મ્યુનિસિપલ કાઉન્સિલના કર્મચારી ચંદ્રકાંત અનારકે, સ્થાનિક રહેવાસીઓ સુમિત ચેલાની અને શૈલેષ જાધવે પણ જીવ ગુમાવ્યો. મૃતક ચંદ્રકાંત અનારકે મોટરસાઇકલ ચલાવી રહ્યા હતા અને ટક્કર બાદ ફ્લાયઓવરની નીચે પડી ગયા હતા.
અકસ્માતની જાણ થતાં જ ઘટનાસ્થળે મોટી સંખ્યામાં લોકો ભેગા થઈ ગયા હતા. લોકોએ સમયસૂચકતા વાપરીને કારના કાચ તોડીને ગંભીર રીતે ઘાયલ થયેલા ઉમેદવાર કિરણ ચૌબેને બહાર કાઢ્યા હતા. તેમને તાત્કાલિક ખાનગી હોસ્પિટલમાં દાખલ કરવામાં આવ્યા છે, જ્યાં તેમની સારવાર ચાલી રહી છે. કિરણ ચૌબેએ પોલીસને આપેલી જુબાનીમાં જણાવ્યું કે, "અચાનક ડ્રાઇવરે હલનચલન કરવાનું બંધ કરી દીધું. હું કંઈ સમજી શકું તે પહેલાં, કાર નિયંત્રણ બહાર નીકળી ગઈ અને અનેક વાહનોમાં અથડાઈ ગઈ." અન્ય ઘાયલોમાં અમિત ચૌહાણ અને અભિષેક ચૌબેનો સમાવેશ થાય છે.
સ્થાનિક પોલીસે ઘટનાસ્થળે પહોંચીને કાયદેસરની કાર્યવાહી હાથ ધરી છે. પ્રાથમિક તપાસમાં પુષ્ટિ મળી છે કે અકસ્માતનું મૂળ કારણ ડ્રાઇવરને આવેલો અચાનક હૃદયરોગનો હુમલો હતો. પોલીસે અકસ્માતનું ચોક્કસ વિશ્લેષણ કરવા માટે તમામ વાહનોના ક્ષતિગ્રસ્ત ભાગો અને સીસીટીવી ફૂટેજ એકત્રિત કર્યા છે. આ કરૂણ ઘટનાએ સમગ્ર શહેરને શોકમાં ગરકાવ કરી દીધું છે અને વાહન ચલાવતી વખતે ડ્રાઇવરની તંદુરસ્તી અને માર્ગ સલામતીના મુદ્દાઓ પર ગંભીર સવાલો ઊભા કર્યા છે.