છેલ્લા 8 દિવસમાં સૌથી લોકપ્રિય હેં...વારાણસીમાં ભાજપનો પરાજય 9:51 AM
અમેરિકા વિઝા રિજેક્શન રેટ રેકોર્ડ સ્તરે : હજારો ગુજરાતીનાં સપનાં રોળાયાં
સ્ટૂડન્ટ વિઝા પર અમેરિકા જવા માંગતા માંડ ૧૫ ટકા લોકોને મળી રહ્યા છે વિઝા : ખર્ચો માથે પડતાં સ્ટૂડન્ટ્સ સાથે તેમના ફેમિલી મેમ્બર્સ પણ હતાશ : જાન્યુઆરી ઈનટેક શરૂ થવાની તૈયારીમાં હોવા છતાંય ઘણા એપ્લિકન્ટ્સ હાલ વિઝાની રાહ જોઈ રહ્યા છે અને જેમની એપ્લિકેશન રિજેક્ટ થઈ છે તેમને તેની પાછળનું કારણ ના સમજાઈ રહ્યું હોવાથી હવે તેઓ થાકી ચૂકયા છે
વોશીંગ્ટન, તા.૨૫: ડોનલ્ડ ટ્રમ્પના પ્રેસિડેન્ટ બન્યા બાદ અમેરિકાએ પોતાની ઈમિગ્રેશન પોલિસી એટલી બધી ટાઈટ કરી દીધી છે કે હવે લોકોની એપ્લિકેશન્સ આડેધડ રિજેક્ટ થઈ રહી છે, ખાસ તો સ્ટૂડન્ટ વિઝાની જ વાત કરીએ તો હાલના દિવસોમાં માંડ ૧૫ ટકા સ્ટૂડન્ટ્સને જ વિઝા મળી રહ્યા હોવાથી હજારો ગુજરાતી સ્ટૂડન્ટ્સે અમેરિકા જવાનું જ માંડી વાળ્યું છે. અમારા સાથી અખબાર ટાઈમ્સ ઓફ ઈન્ડિયાના રિપોર્ટ અનુસાર વિઝા રિજેક્શન રેટ અગાઉ કયારેય જોવા ના મળ્યો હોય તે સ્તરે પહોંચી ગયો છે અને અપોઈન્ટમેન્ટ્સ પણ સરળતાથી નથી મળી રહી.
જાન્યુઆરી ઈનટેક શરૂ થવાની તૈયારીમાં હોવા છતાંય ઘણા એપ્લિકન્ટ્સ હાલ વિઝાની રાહ જોઈ રહ્યા છે અને જેમની એપ્લિકેશન રિજેક્ટ થઈ છે તેમને તેની પાછળનું કારણ ના સમજાઈ રહ્યું હોવાથી હવે તેઓ થાકી ચૂકયા છે.સપ્ટેમ્બર ઈનટેક દરમિયાન અમેરિકા જનારા લોકોની પણ આ જ સ્થિતિ હતી અને વિન્ટર ઈનટેકમાં જે લોકો યુએસ જવાનો પ્લાન કરી રહ્યા છે તેમની હાલતમાં પણ કોઈ સુધારો નથી થયો. ઘણા સ્ટૂડન્ટ્સે સપ્ટેમ્બર ઈનટેકમાં યુએસ જવાનો મેળ ના પડતાં વિન્ટર સુધી રાહ જોવાનું નક્કી કર્યું હતું પરંતુ હવે તે લોકો પણ બંને બાજુથી ફસાયા છે અને ઘણા લોકોએ હવે અમેરિકા જવાનું જ પડતું મૂકી બીજા દેશો પર નજર દોડાવી છે.
રશ્મી નાયક નામની એક સ્ટૂડન્ટે આ અંગે ટાઈમ્સ ઓફ ઈન્ડિયા સાથે વાત કરતા જણાવ્યું હતું કે હવે પોતે અમેરિકા જવાને બદલે ઓસ્ટ્રેલિયા જઈ રહી છે. રશ્મીએ ફેબ્રુઆરી ઈનટેકમાં એડમિશન લઈ લીધું છે અને તે બેચલર ઓફ સાયન્સનો અભ્યાસ કરશે. તેનું એમ પણ કહેવું છે કે પોતે કયારેય અમેરિકા સિવાયના બીજા કોઈ દેશમાં ભણવા જવા નહોતી માગતી પરંતુ હવે તેની પાસે કોઈ ઓપ્શન નથી રહ્યો કારણકે અમેરિકાની રાહ જોવામાં તેનું આખું વર્ષ બગડે તેમ છે. રશ્મીના યુએસ વિઝા રિજેક્ટ થયા હતા અને ત્યારબાદ તેણે ફરી અપોઈન્ટમેન્ટ લેવાનો ટ્રાય કર્યો હતો પરંતુ હવે તેને સ્લોટ નથી મળી રહ્યો.
અમદાવાદમાં પ્રેક્ટિસ કરતાં કન્સલ્ટન્ટ્સ પણ કહી રહ્યા છે કે ૨૦૨૫ અત્યારસુધીનું સૌથી મુશ્કેલ વર્ષ સાબિત થયું છે. ભાવીન ઠક્કર નામના એક કન્સલ્ટન્ટનું માનીએ તો હાલ અમેરિકાનો વિઝા રિજેક્શન રેટ તેના સર્વોચ્ચ સ્તરે પહોંચી ગયો છે અને તેમાંય મોટાભાગના કેસમાં રિફયૂઝલ લેટર એક સ્ટાન્ડર્ડ ફોર્મેટના જ હોય છે જેમાં વિઝા ના મળવાનું કોઈ ચોક્કસ કારણ નથી જણાવાયું હોતું. સ્ટૂડન્ટ્સ અને તેમના ફેમિલી મેમ્બર્સ માટે આ સ્થિતિ માત્ર ઈમોશનલ જ નહીં પરંતુ ફાઈનાન્શિયલ સ્ટ્રેસનું પણ કારણ બની રહી છે.
મૌલેશ પ્રજાપતિ નામના અન્ય એક સ્ટૂડન્ટે આ અંગે જણાવ્યું હતું કે તેને યુએસની કોલેજમાં એડમિશન મળી ગયું હતું, I-20 પણ આવી ગયું હતું અને સપ્ટેમ્બર ઈનટેકમાં ટેક્સસ ઈન્સ્ટિટયૂટમાંથી સ્કોલરશિપ પણ ઓફર કરવામાં આવી હતી પરંતુ જુલાઈમાં વિઝા ઈન્ટરવ્યુ આપ્યા બાદ મૌલેશની એપ્લિકેશન રિજેક્ટ થઈ જતાં તેના યુએસ જવાના અરમાનો પર પાણી ફરી વળ્યું હતું. તે વખતે મૌલેશને તેના કન્સલ્ટન્ટે અમેરિકને બદલે બીજા કોઈ દેશમાં જવાની સલાહ આપી હતી, તેમની સલાહ પર એક વર્ષનો બ્રેક લઈ મૌલેશ સ્પેસ એન્જિનિયરિંગનો અભ્યાસ કરવા જર્મની અથવા યુકે જવાનો પ્લાન કરી રહ્યો છે.
અમેરિકાના સ્ટૂડન્ટ વિઝા માટે એપ્લિકેશન કરવાની પ્રોસેસમાં એકાદ લાખ રૂપિયા જેટલો ખર્ચો થતો હોય છે, જેમાં વિઝા ફી, એક્ઝામ અને યુનિવર્સિટી એપ્લિકેશન સહિતની કોસ્ટ સામેલ છે. જોકે, જેમને સારી ઈન્સ્ટિટયૂટ્સમાં એડમિશન મળી ગયા છે તેમને પણ હવે વિઝા મળશે જ તેની કોઈ ગેરંટી નથી રહી.
(3:09 PM IST)
